इन्डियन गोर्खा जनशक्ति फ्रन्टका प्रमुख अजय एडबर्डसले राज्यकी मुख्यमन्त्री सुश्री ममता ब्यानर्जीलाई उत्तर बङ्गालका चिया बगानहरूमा चलिरहेको ज्याला सङ्कटप्रति गहिरो चिन्ता व्यक्त गर्दै पत्राचार गरेका छन्। जुन पत्रमा चारसूत्रीय माग एडबर्डसले राखेका छन्। ती हुन्ः 1.चिया बगान मजदुरहरूलाई सीपयुक्त श्रमिकको रूपमा वर्गीकरण गर्दै,जुलाई–डिसेम्बर २०२५ को दर अनुसार पृथक र औपचारिक न्यूनतम ज्याला सूचना जारी गरियोस्। 2.दार्जीलिङ,तराई,डुवर्स र जलपाईगुडीका बगानहरूमा नियमित निरीक्षण र ज्याला अभिलेखको प्रत्यक्ष प्रमाणीकरणमार्फत कानूनी कार्यान्वयन सुनिश्चित गरियोस्। 3.मजदुर सङ्गठनहरू,स्थानीय जनप्रतिनिधि र व्यवस्थापन प्रतिनिधिहरू समावेश गरिएको विशेष समिति गठन गरि, मुद्रास्फीति र जीवनयापन खर्चअनुसार न्यायोचित ज्याला संरचना तय गरियोस्। 4.विगतमा न्यूनतम ज्यालाभन्दा कम पाएको अवधिका लागि मजदुरहरूलाई बक्यौता वा क्षतिपूर्तिसहितको भुक्तानी गरियोस्।
