खरसाङ, (निसं): खरसाङ बजारमा अव्यस्थित प्रकारले टाँगिएको केबल तारको कारण जनसाधरणले समस्याको सामना गर्न परिरहेका छन्। टेलिभिजन सेवा, इन्टरनेट अनि टेलिफोन सेवाका यस्ता केबलहरू शहरको विभिन्न स्थानमा अव्यस्थित प्रकारले जड़ान गरिएको छ भने अव्यस्थित प्रकारले जड़ान गरिएका यस्ता केबलहरू चुड़िएको, लत्रिएको, झुण्डिएको अवस्थामा रहेकोले जनसाधरणले विभिन्न समस्या झेलिरहेका छन्।
खरसाङको वर्द्धवान रोडमा टाँगिएको केबल चुड़िएर झुण्डिरहेको अवस्थामा पाइएको छ। यस रोडको तल्लो किनार भएर गाड़ी चलाउदा केबलले गाड़ीमा छुने गरेको कतिपय ट्रक चालकहरूले गुनासो गरेका छन्। सुपर मार्केटदेखि गड्डी लाईन जाने बाटोमा पनि विभिन्न सेवाको केबल लत्रिएकोले यहाँबाट हिँड़दा समस्या भइरहेको कतिपयले गुनासो गरेका छन्। यसरी शहरको अन्य स्थानमा पनि विभिन्न सेवाको केबलहरू लत्रिएको, झुण्डिएको, चुड़िएको अवस्थामा रहेकोले मानिसहरूले समस्याको सामना गर्न परेको बताएका छन्।
गत वर्ष खरसाङ शहरमा अव्यस्थित तरिकाले टाँगिएका केबलहरूको बारेमा जनसाधरणबाट गुनासो प्राप्त भइरहेको समय यहाँको वर्द्धवान रोडको एउटा बिजुलीको पोलमा गुजुल्टिएको केबलमा आगो लागेपछि महकुमा प्रशासन अनि खरसाङ नगरपालिकाले शहरमा अव्यस्थित तरिकाले टाँगिएको केबलहरू काट्ने काम गरेको थियो। महकुमा प्रशासन अनि नगरपालिकाको उक्त कार्वाहीपछि शहरमा नयाँ प्रकारले केबल टाँगिने कार्य भएको थियो। बिस्तारै शहरमा टाँगिएका केबलहरू अव्यस्थित बन्दै गएपछि वर्तमानमा पुनः समस्या बनेको छ। यसरी शहरमा केबलहरू अव्यस्थित प्रकारले किन राखिएको भनी जान्न चहादा एक इन्टरनेट सेवा प्रदान गर्ने एजेन्सीका व्यक्तिले बाँदर केबलमा झुण्डिने, केबलबाटै हिँड़ने गरेकाले चुड़ाइदिने, लत्राइदिने गरेको बताए। तथापि यस विषयमा सम्बन्धित निकायले यस दिशामा कदम चाल्नु पर्ने आवश्यकता भने देखिएको छ।
