खरसाङ, 27 जून (निसं): दार्जीलिङ हिमालयन रेलवेद्वारा एउटा प्रेस विज्ञप्ति जारी गर्दै जनाइए अनुसार एसएजी स्तरीय अधिकारीहरूको नेतृत्वमा पूर्वी रेलवेका वरिष्ठ अधिकारीहरूको टोलीद्वारा दार्जीलिङ हिमालयन रेलवे (डीएचआर) को अन्तर-रेलवे सुरक्षा लेखा परीक्षण गरियो। लेखा परीक्षणको उद्देश्य डीएचआरले पालना गर्दै आएको सुरक्षा मापदण्ड र सञ्चालन अभ्यासहरूको मूल्याङ्कन गर्नु थियो साथै अन्तर-रेलवे उत्कृष्ट अभ्यासहरूको पनि साझा गर्नु थियो। निरीक्षण महानदी रेलवे स्टेशनको विस्तृत भ्रमणबाट शुरु गरिएको थियो। त्यसपछि महानदी अनि खरसाङ बीचको लाइन निरीक्षण गरियो, जसले मार्गमा विभिन्न सुरक्षा र महत्वपूर्ण पूर्वाधारहरूलाई समेटेको छ। भ्रमण टोली खरसाङ स्थित डीएचआरको मुख्यालय एलेसिया भवनमा पनि पुगेको थियो। जहाँ टोलीका अधिकारीहरूलाई सुरक्षा अभिवृद्धि उपायहरूसँगै प्रमुख सम्पदा संरक्षणको पहलहरूको बारेमा जानकारी गराइएको थियो। सुरक्षा र सम्पदा अखण्डताको उच्चतम मापदण्डहरू कायम राख्दै युनेस्को विश्व सम्पदा रेलवे सञ्चालन गर्ने अद्वितीय चुनौतीहरूलाई प्रकाश पारेको थियो। भ्रमण गर्ने अधिकारीहरूले डीएचआरको सञ्चालनको अवस्थाप्रति आफ्नो समग्र सन्तुष्टि व्यक्त गरे अनि टोलीको निरन्तर प्रयासको लागि प्रोत्साहन प्रदान गरे। टोलीका अधिकारीहरूले आगामी दिनहरूमा सुरक्षा प्रोटोकल र मर्मत सम्भार अभ्यासहरूलाई अझ बलियो बनाउन बहुमूल्य सुझाव र सल्लाह पनि साझा गरे। डीएचआर सम्पदा संरक्षण र आधुनिक सुरक्षा मापदण्डहरू बीचको संवेदनशील सन्तुलन कायम राख्न प्रतिबद्ध छ र अन्तर-रेलवे सहकार्यलाई स्वागत गर्दछ भनी डीएचआर निर्देशक रेशव चौधरीले विज्ञप्ति मार्फत जनाएका छन् ।
