असमको शोणितपुर जिल्ला अन्तर्गत पर्ने नदुवार क्षेत्रमा बिहीबार एक अत्यन्त गम्भीर घटना सार्वजनिक भएको छ। असम गोर्खा सम्मेलन सोनितपुर जिल्ला समितिका सभापति गोकुल बस्नेत, कार्यकारी अध्यक्ष दधीराम शर्मा, महासचिव भुवन शर्मा तथा सचिव श्याम छेत्री सवार गाडीमाथि अज्ञात दुर्वृत समूहले प्राणघातक आक्रमण गरेको हो।
प्राप्त विवरणअनुसार करिब १०० जनाको उग्र भीडले राष्ट्रिय राजमार्गमै गाडी रोकेर अचानक हमला गरेको थियो। परिस्थिति निकै भयावह बने पनि नेताहरूले मुस्किलले ज्यान जोगाउन सफल भएका छन्।
राष्ट्रिय संगठनका नेतृत्वमाथि भएको यस्तो हिंसात्मक घटनाले अहिले क्षेत्रभर त्रास र आक्रोश फैलिएको छ। यदि जातिका नेताहरू नै सुरक्षित छैनन् भने सर्वसाधारण जनता कस्तो डर र असुरक्षाबीच बाँचिरहेका होलान भन्ने प्रश्न गम्भीर रूपमा उठ्न थालेको छ।
घटनापछि जिल्ला समितिले प्रहरी अधीक्षकसमक्ष औपचारिक उजुरी दर्ता गरिसकेको छ र संलग्न दोषीहरूलाई यथाशीघ्र पक्राउ गरी कडा कानुनी कारबाही गर्न माग गरेको छ।
यस आक्रमणले समष्टिमा गणतान्त्रिक मूल्य कमजोर बन्दै गएको, त्रास र दमनको वातावरण बढिरहेको भन्ने चर्चालाई थप बल दिएको छ। शान्ति, सुरक्षा र न्यायको प्रत्याभूति गराउनु राज्यको पहिलो दायित्व भएको आवाज अहिले थप सशक्त रूपमा उठिरहेको छ।
