यातायात समस्या समाधानार्थ अधुरो पार्किङ स्ट्यान्डले पाउने पूर्णता

कालेबुङ नगरको केन्द्रस्थल मानिने नोभेल्टी क्षेत्र नजिक निर्माणाधीन बहुमंजिला कार पार्किङ चाँडै नै सञ्चालनमा आउने भएको छ। लामो समयदेखि स्थगित रहेको र लगभग असम्भव मानिएको यो परियोजनाले नगरपालिकाका अध्यक्ष श्री रवि प्रधानको सक्रियता र दूरदर्शी निर्णयका कारण नयाँ गति प्राप्त गरेको छ।
यो परियोजनाको मुख्य चुनौती प्रवेश र निकासका लागि आवश्यक र्याम्प निर्माण गर्नु थियो। वर्षौंदेखि अल्झिएको यो समस्या समाधान गर्न जीटीए प्रमुख अनित थापाले अध्यक्ष रवि प्रधानलाई विश्वास गरी परियोजना सफल तुल्याउने दायित्व सुम्पेपछि प्रधानले व्यक्तिगत रूपमा पहल गर्दै सम्बन्धित क्षेत्रका पसल तथा आवास खाली गराउने साहसिक कदम चाले। उनकै समन्वयमा जीटीए (GTA) ले विस्थापित परिवारहरूलाई नगरपालिकाको खाली जग्गामा निर्मित २-BHK आवासमा सफलतापूर्वक पुनर्स्थापित गरायो, जसले गर्दा पहिलो र्याम्प निर्माणको मार्ग प्रशस्त भयो।
दोस्रो र्याम्प निर्माणको क्रममा पिलर गाड्ने ठाउँमा एउटा आधा भत्किएको घर बाधक बनेपछि काम फेरि ठप्प भएको थियो। तर, हार नमान्दै रवि प्रधानले घरधनीसँग निरन्तर वार्ता र आश्वासनको प्रक्रिया अघि बढाए। उनको कुशल वार्ता क्षमता र विकासप्रतिको निष्ठाकै कारण अन्ततः विवाद समाधान भएको छ। अहिले सो स्थानमा निर्माण कार्य तीब्र गतिमा अगाडि बढिरहेको छ र आगामी १० फेब्रुअरी २०२६ भित्र निर्माण कार्य सम्पन्न गर्ने लक्ष्य निर्धारण गरिएको छ।
यदि रवि प्रधानले यसरी सक्रिय भूमिका नखेलेको भए र्याम्पबिनाको यो पार्किङ स्ट्यान्ड सदैवका लागि अनुपयोगी अवस्थामा रहने निश्चित थियो। उनको यो सक्रियताले कालिम्पोङको दशकौँ पुरानो अधरमा रहेको स्ट्यान्ड तथा यातायात जामको समस्यालाई निकै हदसम्म समाधान गर्नेछ।
“विकासका लागि त्याग र सहकार्य आवश्यक छ भन्ने कुरा रवि प्रधानले व्यवहारमै प्रमाणित गरिदिएका छन्। यो पार्किङ स्ट्यान्ड कालेबुङवासीलाई उनको कार्यकालको एक अविस्मरणीय उपहार सावित हुनेछ।”
स्थानीय नागरिकहरूले पनि अध्यक्ष प्रधानको प्रशंसा गर्दै भनेका छन्, “रवि प्रधानले राजनीतिभन्दा माथि उठेर सहरको हितका लागि काम गरे, उनको यो सक्रियताले कालेबुङको ट्राफिक जामको दीर्घकालीन समाधान हुने कुरामा हामी विश्वस्त छौँ।