अक्टोबर महिनादेखि बन्द रहेको सिंगला नर्थ तकभर चिया बगान 23 फरवरी सोमबारदेखि संचालन हुने भएको छ। बन्द सिंगला चिया बगानलाई पुनः सञ्चालनमा ल्याउने विषय लिएर गत 9 फरवरीको दिन बैठक सम्पन्न भएको थियो तर बैठकमा कुनै निचोड आउन नसक्दा आज पुनः सह श्रमायुक्तको कार्यालयमा बैठक डाकेको थियो। बैठकमा धेरै लामो चर्चा परिचर्चापछि 23 फरवरी सोमबारदेखि सिंगला चिया बगान संचालन गरिने सहमति भएको छ।
बगानमा स्टाफ सब स्टाफहरू धेरै रहेको मालिक पक्षले गुनासो पोखेपछि 7 जना सब स्टाफहरूले आफ्नो इच्छाले त्याग पत्र दिने आजको बैठकमा घोषणा गरे। तर ती सब स्टाफहरूले त्याग पत्र दिएकै दिन उनीहरूले पाउने ग्रेज्युटीको आधा अंश त्यसै दिने अनि रहल राशी चार महिनाभित्रमा भुक्तान गर्ने तर त्याग पत्र दिएका स्टाफहरूले चार महिनाभित्रमा रहल राशी नपाएको खण्डमा उनीहरू आफ्नो काममा पुनः फर्किने आजको बैठकमा सहमति भएको छ।
त्यसरीनै बगानमा कार्यरत स्टाफहरूको एक महिनाको वेतन र श्रमिकहरूले पाउने रोजी 27 फरवरीभित्रमा भुक्तान गरिने आजको बैठकमा सहमति भएको छ। आजको सहमति पत्रमा बगानबाट त्याग पत्र दिने 7 जना स्टाफहरूलाई कम्पनीको पक्षबाट 35 हजार रूपिया गरेर 28 मार्चभित्रमा क्षतिपूर्ति प्रदान गर्ने भएको हाम्रो हिल तराई डुवर्स चियाबारी श्रमिक संघका केन्द्रीय अध्यक्ष डीके गुरूङले जनाएका छन्।
