मर्मतले झन भत्कियो चिल्ड्रेन पार्क

दार्जीलिङ,22 फरवरी(निसं): लाखौं रुपियाँद्वारा मर्मत गरिएको दार्जीलिङ रेड क्रस चिल्ड्रेन पार्क नवीनीकरण होइन झन भत्किएर, अव्यवस्थित र कुरुप भएकोछ। दार्जीलिङ  नगरपालिका 15 नम्बर वार्ड अन्तर्गत पर्ने रेडक्रस चिल्ड्रेन पार्कको अवस्था पहिलाको भन्दा धेरै बिग्रन्दै गइरहेको छ। दार्जीलिङ रेड क्रस सोसाइटीको दार्जीलिङ ब्राञ्ज कार्यालयको प्रांगणमा रहेको यो रेड क्रस चिल्ड्रेन पार्कको पुरानो गरिमामय अनि बलियो बालक्रीडा सामग्रीहरू हटाएर सस्तो अनि कमजोर सामग्रीहरू लगाएकोले गत केही महिनाअघि यस रेडक्रस पार्क-भित्र भएको नानीहरू खेल्ने फलामको पिङ भत्किएर दुर्घटना हुन पुगेको जानकारीछ। हाल यो भत्किएको फलामको पिङलाई पार्कको एक कुनामा थन्काई दिएको देखिन्छ साथै पिङको अवस्था हेर्दा त्यस घटनामा बालबालिकाहरू घाइते भएको स्पष्ट रहेको स्थानीय मानिसहरु बताउँछन्। पिङ खेल्ने झुला एकातिर फ्याँकिएको छ अर्कोतिर भाँचिएको पिङ फ्याँकिएको छ, झट्ट हेर्दा यसलाई खतरनाक अवस्थामा रहेको फलामको टुक्राहरू देखिन्छ। दार्जीलिङ सहर बीचमा रहेको यो चिल्ड्रेन पार्कको मर्मतको निम्ति लगभग 25 लाख रुपियाँ जीटीए(गोर्खाल्याण्ड टेरिटोरियल एड्मिनिस्ट्रेसन)-ले अनुमोदन गरिदिएको पन स्थानीय मानिसहरु बताउछन्।