खरसाङ, (निसं)ः खरससाङ महकुमा अस्पतालका अस्थायी कर्मचारीहरूले खरसाङ शहर चिम्नी देवराली समष्टि सभासद् एवं खरसाङ्क क्षेत्रका स्वस्थ्य एवं परिवार कल्याण्ड विभागका भारप्राप्त सभासद् श्याम शेर्पासित भेट गरेर विविध समस्याहरूको बारेमा अवगत गराएका छन्।
मंगलवार अस्पतालमा कार्यरत अस्थायी कर्मचारीहरू सभासद् शेर्पालाई भेटन तिनको निवासमा पुगेका थिए। कर्मचारीहरूले सभासद्लाई अहिलेसम्म झेल्दै आएका विविध समस्याहरूबारे जानकारी गराउदै समस्या समाधानको निम्ति सहयोगको अनुरोध गरे। सभासद् शेर्पाले सौहार्दपूर्ण वातावरणमा कर्मचारीहरूको समस्या गम्भीरतापूर्वक सुनेपछि समाधानको पहल अवश्यै गर्ने कर्मचारीहरूलाई आश्वस्त पार्दै यी विषयलाई जीटीए चिफ समक्ष राखेर समाधान गरिदिने आश्वासन दिए। तिनले यी विषयहरूमा जीटीए चिफसित कुरा गर्नको निम्ति समय मिलाएर प्रत्यक्ष भेट गराइदिने पनि सभासद्ले कर्मचारीहरूलाई आश्वासन दिए। खरसाङ महकुमा अस्पतालमा रहेका समस्या अनि कर्मचारीहरूले भोगिरहेका समस्याहरूलाई रोगी कल्याण समितिमा राखिदिने पनि सभासद्ले कर्मचारीहरूलाई आश्वस्त गराए।
अस्पतालमा रहेको अनि कर्मचारीहरूले भोगिरहेका समस्याको विषयमा बताउदै सभासद् श्याम शेर्पाले हिमालय दर्पणलाई भने, मंगलवार खरसाङ महकुमा अस्पतालका अस्थायी कर्मचारीवर्गले अस्पतालमा रहेका समस्या अनि तिनीहरूले भोग्दै आइरहेका समस्याहरूको जानकारी मसित भेट गरेर गराएका छन् अनि समाधानको निम्ति अनुरोध पनि गरेका छन्। कर्मचारीहरूको समस्या मैले राम्ररी बुझेको छु अनि तिनीहरूको माग पनि सही रहेको छ। यी समस्या समाधानको निम्ति मैले सकेसम्म प्रयास गर्नेछु अनि समस्याको समाधानको लागि कर्मचारीहरूलाई लगेर जीटीए चिफ अनित थापासित पनि भेटघाट गराउनेछु। कर्मचारीहरूलाई पनि आ-आफ्नो दायित्व निष्ठापूर्वक निभाइदिने, अस्तपालमा रोगीहरूको सेवामा निरन्तरता दिने अनुरोध गरेको छु।
