खरसाङ, (निसं): गत 18 जनवरी आइतवारको दिन अम्बोटे चिया बगानको पाँचघरे निवासी साहित्यकार कर्ण पुरकुटीको निवास स्थानमा उनकी दिवङ्गत माता गायिका छायाँ पुरकुटीको 88 अैँं जन्मजयन्ती सहित श्रद्धाञ्जली कार्यक्रम सम्पन्न गरियो। यसै कार्यक्रम अन्तर्गत एक साहित्यिक गोष्ठीको पनि आयोजना गरिएको थियो। उक्त कार्यक्रमको अध्यक्षता साहित्यकार ऋषि राईले गरेका थिए भने विशिष्ट अतिथिको रुपमा नमस्ते खरसाङ च्यानलका निर्देशक निर्मल गुरुङ, साहित्याकर निरङ्कर थापा, सञ्जीव छेत्री, उदय दुमी, रचिता छेत्री, पाँचघरे समाजका अध्यक्ष सहित सदस्यगण उपस्थित रहेका थिए।
कार्यक्रमको आरम्भमा अध्यक्ष एवम् विशिष्ट अतिथि, परिवारका सदस्य अनि परिजनको बाहुलीद्वारा धुपदीप प्रज्ज्वलन, माल्यार्पण गरिएको थियो। स्व0 छाँया पुरकुटीका पुत्र कर्ण पुरकुटीले आफ्नो मन्तव्य प्रकट गर्दै भने, माता छायाँ पुरकुटी एक लोकगायिका सहित समाजसेवी सेवी पनि थिइन्। सङ्गीतको क्षेत्रमा धेरै काम गरकी हुनाले हामी घर-परिवारले नै घरको प्राङ्गणमा आमाको अर्ध कदको सालिग निर्माण गरेर सदा सम्झनामा राख्ने कार्य गरेको छौँ।
कार्यक्रममा विशिष्ट अतिथि निर्मल गुरुङ, अध्यक्ष ऋषि राईले आफ्नो मन्तब्यमा आमाले पुऱ्याएकी योगदानको कदर कसरी गर्नु पर्ने हो कर्ण पुरकुटी परिवारजनले आफ्नो आमाकोअर्ध कदको सालिग घरको प्राङ्गणमा खड़ा गरेर उदाहरणीय कार्य गरेको बताउदै उनी लगायत परिवारजनलाई हार्दिक आभार प्रकट गरे। तिनीहरूले पुरकुटी परिवारबाट यस विषयमा धेरै कुरा सिक्न पर्ने विचार व्यक्त गरे। निलम कुमार गिरीद्वारा सञ्चालन गरिएको यस कार्यक्रममा निरङ्कर थापा, सञ्जीव छेत्री, उदय दुमी, रचिता छेत्री, देवकुमार थापा, दिरप गिरी, विनय बराइली, निलम कुमार गिरी, ऋषि राई आदिले आमा शीर्षकमाथि रचित कथा, कविता, लेख आदि सुनाए। कार्यक्रमका अध्यक्ष ऋषि राईले कार्यक्रम आयोजक पुरकुटी परिवार सहित उपस्थित सबैलाई धन्यवाद दिएका थिए।
