दार्जीलिङ,22 फरवरी(निसं): आजदेखि भ्रष्टाचारमुक्त भएको छु भन्दै भाजपाका बूथ अध्यक्ष मणिराज राई र उपाध्यक्ष इन्द्रमणि लिम्बुले भाजपा(भारतीय जनता पार्टी)-लाई त्यागेर इण्डियन गोर्खा जनशक्ति फ्रन्टको समर्थन जनाए। गोक सास बोटेमा शनिबार इण्डियन गोर्खा जनशक्ति फ्रन्टको समर्थन सभा सम्पन्न भयो। आयोजित सभामा पार्टीका केन्द्रीय संयोजक अजय एडवर्ड्स विशेष रूपमा उपस्थित रहेका थिए। यसै अवसरमा नयाँ नोर बूथ नम्बर 23/50 का भारतीय जनता पार्टीका अध्यक्ष मणिराज राई र उपाध्यक्ष इन्द्रमणि लिम्बु इण्डियन गोर्खा जनशक्ति फ्रन्टमा सामेल भए। पार्टीका केन्द्रीय संयोजक अजय एडवर्ड्सले खदा लगाइ पार्टीमा स्वागत जनाए।यसै क्रममा मणिराज राईले भने,अजय एडवर्ड्सको भिजन मलाई मन परेर म आईजीजेएफमा सामेल भएको हुँ। भारतीय जनता पार्टीले हामीलाई आश्वासन मात्र देखायो। यति मात्र होइन, भाजपाले हरेक कुरालाई राजनीतिक दृष्टिकोणले मात्र हेर्ने काम गरेको पाए। सरकारले जारी गरेको सानोभन्दा सानो सहुलियतमा पनि उनीहरूले राजनीति गर्छन्। यी सबै नीतिहरूदेखि वाक्क भएर आफू गोर्खा जातिको हितमा इण्डियन गोर्खा जनशक्ति फ्रन्टमा सामेल भएको हुँ र आजदेखि म भ्रष्टाचारमुक्त भएकोछु। सहन नसकिने आश्वासनबाट टाढिएर तपाईँहरू सबै इण्डियन गोर्खा जनशक्ति फ्रन्टमा आउने आव्हान गरे।यसरी नै इन्द्रमणि लिम्बुले भने,गोर्खाल्याण्डको हुंकार गर्ने नेताहरूले जनतालाई भ्रममा पारेर छोडेर गए। हामी गोर्खा जातिको स्वाभिमान बिक्री नगर्ने नेताको खोजीमा थियौं, र हामीले अजय एडवर्ड्स जस्तो इमानदार नेता पाएका छौं।
