चुनाउ जितेर गोर्खाल्याण्ड हुँदैन। हामीले बीजेपीलाई भोट दिएर चुनाउ जिताएर कहिले पनि गोर्खाल्याण्ड हुनेछैन भन्दै जीटीए प्रमुख अनित थापाले
यसपालिको चुनावमा भोट आफ्नो निम्ति हाल्ने अनुरोध गरे। आज सदर 1 समष्टि, माउण्ट भेल्ली, नर्थ पोइण्ट, दार्जीलिङमा आयोजित एक आधिकारिक शिलान्यास समारोहमा थापाले गोर्खा सुधार सम्मेलन सार्वजनिक भवन (तीन तल्ला) को निर्माणकार्यको विधिवत शिलान्यासकाे क्रममा माथिका मन्तव्य दिएका हुन्। यो परियोजना दार्जीलिङ इन्जिनियरिङ डिभिजन, गोर्खाल्याण्ड क्षेत्रीय प्रशासन (GTA) ले कुल रू. १,०४,५७,०६३.००/- (एक करोड चार लाख सन्ताउन्न हजार त्रिसट्ठी रुपैयाँ)को लागतमा पूरा गर्नेछ।
शिलान्यास कार्यक्रममा थापाले भने:१. हिजोको दिन कुनै नेताहरुले यो समाज भवन बनाएनन्। आज उनको समयमा भवन निर्माण हुँदैछ। अब मलाई भोट दिनुहोस् भनेर म भन्दिन। तर म चाहन्छु पहाडको हरेक व्यक्तिले विचारको परिवर्तन गरोस्। २. पहाड बिगार्ने हामी नै थियौं। यसको जिम्मेवारी हामीले आफै लिनुपर्छ। हामीलाई विरोध गरेर अनि अरूको आलोचना गरेर केही फाइदा हुँदैन। ३. भोट हालेर गोर्खाल्याण्ड कहिले हुँदैन। यो प्रमाण भई सकेको छ। अब चुनाउ आउँदैछ। गोर्खाल्याण्डको कुरा हुँदैछ। केन्द्रले चाह्यो भने गोर्खाल्याण्ड आफै हुन्छ। हामीले बीजेपीलाई भोट दिएर चुनाउ जिताएर कहिले पनि गोर्खाल्याण्ड हुनेछैन। ४. म राज्य सरकार सँग मिलेर नै काम गर्छु। मैले मिलेन भने मेरो मान्छेले दुःख पाउँछ। ५. अरू नेताहरुले राज्य सरकार सँग मिल्छु भन्नु सक्दैन। कारण उनीहरुले भन्ने बित्तिकै उनीहरूले भोट पाउँदैनन्। हाम्रो दिमागमा बंगाल विरोधी सोच हाली दिएको छ। त्यसै कारण हामी बंगाल विरूद्ध गाली बक्छौ। तर बंगाललाई किन गाली गरेको भनेर सोध्नु होस् कारण बिना नैं हामी गाली गरिरहेका छौं। ६. जुन राज्यमा हामी बस्छौ, त्यो राज्य अनि राज्यको सरकारलाई आफ्नो दुश्मन बनाएर हामीलाई फाइदा हुन्छ र? ७.यसपालिको चुनावमा हामीले हाम्रो निम्ति भोट हाल्नु पर्छ। मलाई भोट दिनु नै पर्छ भन्ने होइन। तर अनित थापालाई भोट दिनुहुन्छ भने मेरो काम हेर्नुहोस्। मेरो उपलब्धि हेर्नुहोस। मैले आन्दोलन गरेर कुर्सीमा आएको होईन। मैले चुनाउ जितेर कुर्सीमा आएको हुँ।
८. म पहाडको जनताकाे निम्ति एउटा आशा हुँ। उहाँहरूको मनमा बसेको एउटा आशाको किरण हुँ। त्यसैले उहाँहरूको आशालाई म भत्काउनु चाहान्न, जीटीए प्रमुखले बताए।
