नेपाली फिल्मका अग्रज निर्देशक तुलसी घिमिरेको पछिल्लो फिल्म ‘पहाड’ को प्रिमियर काठमाडौंमा भएको थियो, जसले युवाहरू विदेश पलायन हुँदा पहाडहरूको जनसंख्या घट्दै जाँदा उत्पन्न हुने सामाजिक र आर्थिक समस्याहरूलाई देखाउँछ। फिल्ममा बिपिन कार्की, सुनील थापा, मदनकृष्ण श्रेष्ठ, रेणुनाथ योगी, अरुण क्षेत्री, रवीन्द्र सिंह बानियाँ र उमा गिरीको अभिनय रहेको छ। घिमिरे आफैले लेखेको यो फिल्मले “राष्ट्रिय वास्तविकता” प्रतिबिम्बित गर्ने र दर्शकहरूलाई आफ्नो जरा अनि आधुनिक नेपाली डायस्पोराको तीतोमीठो वास्तविकतासँग व्यक्तिगत सम्बन्ध महसुस गराउने लक्ष्य राखेको छ। यो फिल्म नेपालको सुन्दर तर बढ्दो रूपमा सुनसान पहाडहरूको पृष्ठभूमिमा सेट गरिएको छ र यी एक समय जीवन्त समुदायहरूले अब कसरी पहिचान र अस्तित्वको संकटको सामना गरिरहेका छन् भनेर देखाउने लक्ष्य राखेको छ।
फिल्म ‘पहाड’ अहिले प्रदर्शनमा छ। पहिलो नेपाली फिल्म “बाँसुरी”बाट निर्माण र निर्देशनको यात्रा थालेका तुलसी घिमिरेका सबै फिल्महरू सुपरहिट रहेका छन्। यो ‘पहाड’ उनको २४औँ फिल्म हो, जसले पहाडमा भइरहेको युवा पलायन र त्यसले निम्त्याएको सामाजिक, आर्थिक र वातावरणीय असरको कथा भन्छ।
यसपटक ‘पहाड’ कथा मात्र होइन, घिमिरे परिवारका लागि पुस्ता हन्तान्तरणको विन्दू पनि हो। यही फिल्मबाट उनकी दुई छोरी भावना र पञ्चमीले नेपाली फिल्म क्षेत्रमा डेब्यू गरेका छन्।
जेठी छोरी भावना पर्दा पछाडि निर्माण नियन्त्रकको रूपमा छिन् भने कान्छी पञ्चमी शीर्ष अभिनेत्रीको भूमिकामा। एउटै फिल्ममार्फत बुबासँग सहकार्य गर्दै दुवै बहिनीले आफ्नो यात्रा सुरु गरेका हुन्।
मुम्बईमा वर्षौं काम र तालिम लिएपछि नेपाल फर्किएका उनीहरू अब यही उद्योगमा भविष्य खोज्ने तयारीमा छन्। भावना भन्छिन्, ‘मुम्बईमा सिकेको अनुभवलाई यहाँ प्रयोग गर्ने मौका पाएँ। ‘पहाड’ मेरो लागि सिकाइलाई व्यवहारमा उतार्ने प्लेटफर्म बन्यो।’
उनले बलिउडमा विज्ञापन फिल्म र सेट डिजाइनमा काम गरेको अनुभवले आफूलाई धेरै सहयोग पुगेको बताइन्। ‘बुवासँग काम गर्दा अझ धेरै सिक्ने अवसर मिल्यो। उहाँको काम गर्ने तरिका नै एउटा पाठशाला जस्तो लाग्छ’ उनी भन्छिन्।
