खरसाङ, 3 जनवरी(निसं): भारतीय गोर्खा प्रजातान्त्रिक मोर्चा श्रमिक संगठन हिल तराई डुवर्स प्लानटेशन वर्कस युनियन, खरसाङ महकुमा समितिको एक टोलीले कर्मचारी भविष्य निधि संगठन क्षेत्रिय कार्यालय सिलगढ़ीमा क्षेत्रिय भविष्य निधि आयुक्त अधिकारी शैलेन्द्र नारायण झासँग औपचारिक भेटघाट गरेर चिया बगान श्रमिकहरुको भविष्य निधि कोषमा धेरै समस्याहरू भएको अवगत गराउँदै यसको शीघ्र समाधान गरिदिने आग्रह गरेका छन्।
पहाड़का एनसिएलटीभित्र परेका बन्द अनि सञ्चालित बगानहरू भविष्य निधि (पिएफ) कोषमा धेरै समस्याहरू देखिएको हुनाले उक्त समस्यालाई समाधान हेतु प्रत्येक बगानमा शिविर राखने टोलीको मांगलाई अधिकारीले स्वीकार गरे साथै सकारात्मक आश्वासन दिएका छन्। आगामी दिनमा शिविरको आयोजना गरेर श्रमिकहरूको समस्याको समाधान गर्ने जानकारी सभापति सागर गुरुङ सचिव भक्तिमान तामाङले दिएका छन्। यस भेटघाट टोलीमा सङ्गठनको महकुमा समिति सभापति सागर गुरूङ, महासचिव भक्तिमान तामाङ, कार्यकारी सचिव बसन्त कुलुङ राई, उपसभापति किसान लेप्चा, सहसचिव गनु छेत्री, केन्द्रिय समिति सदस्य राजेश थापाको विशेष उपस्थिति रहेको थियो भनी बसन्त कुलुङ राईले खरसाङ्मा यस सम्वाददातालाई बताएका छन्।
