खरसाङ, (निसं)ः दार्जीलिङ जिल्लाले उत्कृष्ट ब्याटमिन्टन खेलाड़ीहरू जन्माइरहेकोमा सांसद राजु विष्टले प्रशंसा गरेका छन्। तिनले यसको प्रशंसा गर्दै भनेका छन्, दार्जीलिङले उत्कृष्ट ब्याटमिन्टन खेलाड़ीहरू जन्माइरहेको छ। अरन्त दक्ष छेत्री ती मध्ये एक राज्यका उत्कृष्ट खेलाड़ी हुन्। यसरी नै अंकित प्रधान पारा ब्याटमिन्टनका असाधरण खेलाड़ी बनेका छन्। आकांक्षा प्रधान, सौरभ विश्वकर्माहरूले हाम्रो क्षेत्रको निम्ति गौरव बढ़ाइरहेका छन्। म ती सम्पूर्ण खेलाड़ी, प्रशिक्षक, अभिभावकहरूको हृदयबाटै प्रशंसा गर्दछु। ती खेलाड़ीहरू, जसले सांसद खेल महोत्सवको सफलताको निम्ति अंशग्रहण गरे, ती सम्पूर्ण सहभागी, प्रशिक्षक, अभिभावक अनि स्वयम् सेवकहरूको सराहना गर्दछु। तिनले सिलगढ़ीको हाकिमपाढ़ामा आयोजित सांसद खेल महोत्सव अन्तर्गत ब्याटमिन्टन प्रतियोगितामा पहाड़ अनि समतलका सहभागी खेलाड़ीहरूसित आफूले साक्षतकार गर्ने अवसर प्राप्त भएको बताउदै यस प्रतियोगितामा एक सय भन्दा अधिक खेलाड़ीहरूले भाग लिएको जनाएका छन्। विष्टले देशका प्रधानमन्त्री नरेन्द्र मोदीले युवाहरूको नेतृत्वमा खेलकुदको विकास गर्ने सपना हरेको बताउदै अघि भनेका छन्, सरकारले युवा सशक्तिकरणको निम्ति कैयौँ कदमहरू चालेको छ। युवाहरूलाई खेलकुद, तक्नीकी, शिक्षा क्षेत्रमा अघि बढ़ाउन अनि उत्कृष्ट उद्यमी बनाउनको निम्ति सकारात्मक कार्य भइरहेको छ। सांसद खेल महोत्सव यसै कदमको एउटा अंश हो। फिट इण्डिया अनि नशा मुक्त भारत बनाउने प्रयासको एक अंश हो सांसद खेल महोत्सव।
