दार्जीलिङ,16 जनवरी (निस): यसपालीको बंगाल विधानसभा चुनाउमा भारतीय जनता पार्टी (भाजपा) ले दार्जीलिङ पहाड़का तीनवटा आसन पहाड़का आफ्ना सहयोगी पार्टीहरूका लागि छोड़िदिन्छ ? कि सबै आसनमा भाजपाले विगतमा जस्तै आफ्नै उम्मेद्वारहरू खड़ा गर्ने हो? यो चर्चाले अहिले दार्जीलिङ पहाड़मा निकै महत्व पाइरहेको छ। यद्यपि, विगतका लोकसभा चुनाउहरूमा भारतीय जनता पार्टीलाई साथ दिने क्षेत्रीय राजनीतिक दलहरू सबैले नै आगामी विधानसभा चुनाउमा भाजपाले क्षेत्रीय पार्टीहरूलाई यी आसनहरू छोड़िदिनुपर्छ भन्ने माग गर्दै आइरहेका छन् ।
यसबारे लोकसभा चुनाउमा भाजपा गठबन्धनमा रहेको क्रान्तिकारी मार्क्सवादी कम्युनिष्ट पार्टी (क्रामाकपा) केन्द्रीय समितिका सांगठनिक सचिव शेखर छेत्रीसित कुराकानी गर्दा उनले भने-दार्जीलिङ पहाड़का
क्षेत्रीय राजनीतिक पार्टीहरूले सन् २००९ देखि नै लोकसभा चुनाउमा भारतीय जनता पार्टीलाई सहयोग प्रदान गर्दै आइरहेका छन्। जसमा सन् २००९ बाहेक भाजपाले जीत पनि हासिल गर्दै आइरहेको छ। यसैले भाजपाले विधानसभा चुनाउमा दार्जीलिङ पहाड़का तीनवटा आसन क्रमैले दार्जीलिङ, खरसाङ अनि कालेबुङ विधानसभा आसन क्षेत्रीय पार्टीहरूका लागि खुल्ला छोड़िदिएको उचित हुनेछ र यसबारे पोर्टीले लगातार कुरा पनि गरिरहेको छ।
तर के भाजपाले यी आसनहरू क्षेत्रीय पार्टीहरूका लागि खुल्ला छोड़िदेला? यो सबैभन्दा ठूलो प्रश्न बनेर अघि आइरहेको छ। किनभने, गत विधानसभा चुनाउमा भारतीय जनता पार्टीले दार्जीलिङ पहाड़का तीनवटै आसनबाट आफ्नै उम्मेद्वार खड़ा गरेको थियो। जसमा दार्जीलिङबाट निरज जिम्बा, खरसाङबाट बीपी बजगाईं अनि कालेबुङबाट शुभप्रधान थिए । जसमध्ये दार्जीलिङ र खरसाङका उम्मेद्वारले जीत हासिल गरेका थिए भने शुभ प्रधान पराजित भएका थिए। यसपाली पनि कालेबुङबाट उम्मेद्वार हुनेहरूको सूची निकै भाजपा
लामो देखा परिरहेको छ। जसमा भाजपा जिल्ला अध्यक्ष कल्याण देवान, कालेबुङ नगरपालिकाका पूर्व अध्यक्ष शुभ प्रधान, सोड्दैन लेप्चाको नाम सबैभन्दा अघि आइरहेका छन्। यसबारे भाजपाले अहिलेसम्म पुष्टि नगरे पनि भाजपा उम्मेद्वारका रूपमा डा. पीडी भोटियाको नाम पनि निकै चर्चामा आइरहेको छ।
विधायक निरज जिम्बालाई यसपाली भाजपाले खरसाङ विधानसभा आसनबाट टिकट दिन्छ भन्ने हल्ला पनि जोड़तोड़ले चलिरहेको छ भने दार्जीलिङबाट यसबाहेक दार्जीलिङका
सञ्जीव लामाको नाम चर्चामा आइरहेको छ। तर यसको ठीक विपरीत भाजपा गठबन्धनमा रहेका पार्टीहरूमध्ये गोर्खा जनमुक्ति मोर्चा (गोजमुमो) ले पनि यसपाली पहाड़का तीनवटै आसनबाट आफ्नै उम्मेद्वार खड़ा गर्ने घाँइघुँई छ। जसअनुसार, दार्जीलिङ विधानसभा आसनबाट पार्टीले गोर्खा जनमुक्ति युवा मोर्चा अध्यक्ष नोमन राईलाई खड़ा गर्ने तय गरेको पनि जानकारी पाइएको छ।
यस सम्बन्धमा नोमन राईसित सम्पर्क गर्दा उनले पनि क्रामाकपाकै लाइनमा भने-हालसम्म लोकसभा चुनाउमा भाजपालाई सहयोग दिइएको हो अनि गोजमुमोले पनि विधानसभा चुनाउमा भाजपाले क्षेत्रीय दलका उम्मेद्वारहरूलाई नै सहयोग गरोस् भन्ने चाहेको छ। तर अहिलेसम्म यसबारे आधिकारिक रूपमा कुनै निष्कर्ष निस्किएको छैन। यदि भाजपाले आफ्नै उम्मेद्वार खड़ा गर्छ वा निरज जिम्बालाई जस्तै अन्य दलका उम्मेद्वारलाई भाजपाको टिकटमा चुनाउमा खड़ा गराउन चाहन्छ भने त्यसमाथि पनि पार्टीले केही सोंच्नेछ । यदि गोजमुमोले आफ्नै उम्मेद्वार खड़ा गर्नु हो भने त्यसमा दार्जीलिङबाट मेरो नाममाथि पार्टीले निर्णय लिइसकेको छ, राईले स्पष्ट पारे।
यसबाहेक भारतीय गोर्खा प्रजातान्त्रिक मोर्चाका सम्भावित उम्मेद्वारहरूको नामबारे अघिबाटै हिमालय दर्पणले एक रिपोर्ट प्रस्तुत गरिसकेको छ।
