सिलगढीस्थित आशा पारा–मेडिकल एन्ड नर्सिङ इन्स्टिच्युटका ३०० भन्दा बढी विद्यार्थीहरूले व्यवस्थापन पक्षविरुद्ध ठगी र भ्रामक जानकारी दिएको आरोप लगाउँदै दार्जिलिङ जिल्लाका जिल्ला अधिकारी (डीएम) समक्ष उच्चस्तरीय छानबिनको माग गरेका छन्।
फेब्रुअरी ११ मिति राखिएको निवेदनमा विद्यार्थीहरूले आफूहरूलाई अध्ययनक्रमहरू सम्बन्धित निकायबाट विधिवत् मान्यता प्राप्त भएको भनी विश्वास दिलाइएको तर पछि आवश्यक नियामक निकायको स्वीकृति नै नभएको तथ्य बाहिरिएको दाबी गरेका छन्। यसका कारण आफ्ना शैक्षिक प्रमाणपत्र, भविष्य र तिरेको शुल्क सबै जोखिममा परेको उनीहरूको भनाइ छ
यस सम्बन्धमा प्रधाननगर प्रहरी चौकीमा मुद्दा दर्ता भइसकेको छ (Pradhan Nagar P.S. Case No. 108/2026)। घटनामा संलग्न रहेको आरोपमा तीन जना कर्मचारी पक्राउ परिसकेका छन् भने उजुरीमा नाम उल्लेख गरिएका मुख्य प्रवर्द्धकहरू फरार रहेको बताइएको छ। विद्यार्थीहरूका अनुसार संस्थाका प्रतिनिधिहरूले पहाडी क्षेत्रका विद्यालयहरूमा काउन्सिलिङ कार्यक्रम सञ्चालन गर्दै मान्यताप्राप्त प्रमाणपत्र र रोजगारीको सुनिश्चितता दिने आश्वासन दिएर भर्ना गराएका थिए। अहिले शैक्षिक भविष्य अन्योलमा परेपछि विद्यार्थीहरूमा त्रास बढ्दै गएको छ।
प्रभावित विद्यार्थीहरूले सम्बन्धित निकायलाई संस्थाको सम्पूर्ण अभिलेख जफत गर्न, नयाँ भर्ना तत्काल रोक्न, शुल्क फिर्ता वा अन्य मान्यताप्राप्त संस्थामा स्थानान्तरणको व्यवस्था गर्न तथा दोषीमाथि कडा कारबाही गर्न माग गरेका छन्। उनीहरूले ३०० भन्दा बढी विद्यार्थीको भविष्य जोगाउन तुरुन्त कदम चाल्न प्रशासनसँग आग्रह गरेका छन्।
