अरुणाचल प्रदेश कांग्रेस समिति (एपीसीसी) ले मायुडिया क्षेत्रमा बाघको आक्रमणमा परेर ज्यान गुमाएका हेड कन्स्टेबल चिकसेङ मन्पाङप्रति गहिरो शोक व्यक्त गर्दै उक्त घटनामा राज्य सरकार र वन विभागको गम्भीर लापरवाही रहेको आरोप लगाएको छ।
एपीसीसी अध्यक्ष बोसिराम सिरामले भनेका छन् , मायुडिया–अनिनी सडकखण्डमा बाघको आवतजावतबारे एक महिनाभन्दा अघिदेखि नै सूचना प्राप्त हुँदै आएको भए पनि सम्बन्धित निकायले कुनै पनि सुरक्षा तथा रोकथामका उपाय अवलम्बन नगरेको कारण यस्तो दुःखद घटना घट्न पुगेको हो।
उनका अनुसार मृतक पुलीस अधिकृत ‘सरकार आपके द्वार’ कार्यक्रममा सहभागी भई अनिनीबाट घर फर्किंदै गर्दा बाघको आक्रमणमा परेका थिए। सो सडकखण्ड वन्यजन्तुको आवागमन हुने संवेदनशील क्षेत्र भए पनि उनलाई कुनै सरकारी सवारी साधन वा सुरक्षा व्यवस्था उपलब्ध गराइएको थिएन।
सिरामले मायुडिया पर्यटकीय गन्तव्यसमेत भएको उल्लेख गर्दै त्यहाँ सर्वसाधारण, पर्यटक तथा सरकारी कर्मचारीहरूको नियमित आवतजावत हुने भएकाले विशेष सुरक्षा व्यवस्था आवश्यक रहेको बताए।
एपीसीसीले वन विभागले प्रभावकारी गस्ती, निगरानी प्रणाली तथा चेतावनी संकेतहरू जडान गर्न असफल भएको आरोप पनि लगाएको छ। विभागलाई क्षेत्रमा ठूला वन्यजन्तुहरूको उपस्थिति थाहा हुँदाहुँदै पनि आवश्यक कदम नचालिएको उनीहरूको दाबी छ।
कांग्रेस समितिले वन्यजन्तु संरक्षणका नाममा मानव जीवन जोखिममा पार्न नहुने स्पष्ट गर्दै मानव–वन्यजन्तु द्वन्द्व न्यूनीकरणका लागि ठोस नीति र कदम आवश्यक रहेकोमा जोड दिएको छ। एपीसीसीले राज्य सरकारसँग तत्काल निम्न मागहरू अघि सारेको छ— मायुडिया क्षेत्रका संवेदनशील स्थानहरूमा कडा सुरक्षा व्यवस्था,
घटनामा लापरवाह बनेका अधिकारीहरूको जवाफदेहिता निर्धारण, मृतकको परिवारलाई एकमुष्ट क्षतिपूर्ति (एक्स–ग्रासिया) तथा योग्य सदस्यलाई सरकारी रोजगारी, संवेदनशील क्षेत्रमा स्थायी वन्यजन्तु निगरानी टोलीको तैनाती, अरुणाचल प्रदेशमा मानव–वन्यजन्तु द्वन्द्वबारे श्वेतपत्र (White Paper) सार्वजनिक।
एपीसीसी अध्यक्ष सिरामले पार्टी मृतकको परिवारको दुःखमा साथ रहेको जनाउँदै, भविष्यमा यस्ता घटनाहरू दोहोरिन नदिन सरकारलाई तत्काल र प्रभावकारी कदम चाल्न आग्रह गरेका छन्।
