प.बं. माध्यमिक २०२६मा अर्चिस्मान मजुमदार राज्यभरि १०औँ स्थान

पश्चिम बंगाल माध्यमिक परीक्षा २०२६ को नतिजामा जलपाईगडीका विद्यार्थी अर्चिस्मान मजुमदारले उत्कृष्ट सफलता हासिल गर्दै राज्यभरि १०औँ स्थान प्राप्त गरेका छन्। उनले कुल ७०० पूर्णाङ्कमध्ये ६८८ अंक ल्याएर जिल्लासहित सम्पूर्ण क्षेत्रको गौरव बढाएका हुन्। जलपाईगडी शहरको सिरिष्टला क्षेत्रका निवासी अर्चिस्मान सानैदेखि मेहनती तथा अनुशासित विद्यार्थीका रूपमा परिचित रहेको बताइएको छ। उनको यस सफलतापछि परिवार, विद्यालय तथा स्थानीयवासीहरूमा खुशीको वातावरण छाएको छ। शिक्षकहरूले पनि उनको निरन्तर अध्ययन, लगनशीलता र आत्मविश्वासकै कारण यस्तो सफलता सम्भव भएको बताएका छन्। यस वर्षको पश्चिम बंगाल माध्यमिक परीक्षामा समग्र उत्तीर्ण प्रतिशत ८६.८३ रहेको जनाइएको छ। राज्यभरि हजारौँ विद्यार्थी सहभागी भएको परीक्षामा अर्चिस्मानले उत्कृष्ट नतिजा निकाल्दै जलपाईगडी जिल्लालाई गर्वित गराएका छन्।