गोरूबथान र सुके पोखरीमा नयाँ फायर स्टेशन निर्माणार्थ स्वीकृति

केही महिना अघि जीटीएले गोरूबथान अनि सुके पोखरीमा अग्निशमन सेवा सञ्चालन गर्नु पर्ने मांग गर्दै योजना तयार गरेर राज्यलाई बुझाएको थियो। त्यसको साथमा अग्निशमन सेवाको निम्ति जमीन चिन्हित गर्ने कार्य पनि सुरु गरिएको थियो। आज राज्य सरकारको अग्नि अनि आपातकालीन सेवा विभागबाट परियोजना पारित भएको अर्डर जीटीएले प्राप्त गरेको छ। यो जानकारी परियोजनाको जीटीए प्रमुख अनित थापाले दिएका हुन्। अग्निशमन सेवा सञ्चालन योजनाका मुख्य बिन्दुहरू यसप्रकार रहेको छः
पश्चिम बंगाल सरकारले दार्जीलिङ र कालेबुङ जिल्लामा दुइ अत्याधुनिक पम्प फायर स्टेशन निर्माणका लागि प्रशासनिक तथा वित्तीय स्वीकृति प्रदान गरेको छ। स्वीकृत योजनाअनुसार कालेबुङ जिल्लाको गोरुबथानमा फायर स्टेशन निर्माणका लागि रु. 4,85,01, 277 (चार करोड पच्यासी लाख एक हजार दुइ सय सत्तहत्तर) को स्वीकृति प्रदान गरेको छ, जस अन्तर्गत नागरिक तथा विद्युत सम्बन्धी कार्यहरू समेटिएका छन्। त्यसरी नै दार्जीलिङ जिल्लाको सुके पोखरीमा फायर स्टेशन निर्माणका लागि रु. 5,60,19,057 (पाँच करोड साठी लाख उन्नाइस हजार सत्तावन्न) को स्वीकृति प्रदान गरेको छ। वित्तीय संरचना अनुसार प्रत्येक योजनाबाट रु. ३ करोड National Disaster Response Fund – NDRF अन्तर्गत, आर्थिक वर्ष 2025 – 26 को “Fire Services Expansion & Modernization” ले व्यहोर्नेछ। बाँकी रकम सार्वजनिक निर्माण कार्यका लागि निर्दिष्ट पूँजीगत हेड (Capital Outlay on Public Works) अन्तर्गत खर्च गरिनेछ। आवश्यक ठेक्का प्रक्रिया र एजेंसी छनोट सम्पन्न भएपछि सम्बन्धित रकम मुख्य वित्त नियंत्रक, जीटीए (DDO Code: DAAHAB053) मार्फत वितरण गरिनेछ। उक्त निर्णय पन्ध्रौँ वित्त आयोगका सिफारिसहरू र राष्ट्रिय स्तरमा सञ्चालनमा रहेको फायर सेवा आधुनिकीकरण योजना अनुरूप, आपदा तयारी, संरचनात्मक सुदृढीकरण तथा क्षमतावृद्धि लक्ष्यका साथ कार्यान्वयन गरिनेछ। यस सम्बन्धमा सरोकारवाला सबै विभागहरूलाई आवश्यक कार्यान्वयन तथा पालना गर्न सूचित गरिएको छ। यो परियोजना स्वीकृत भएकोमा जीटीए प्रमुख अनित थापाले गोरूबथान र सुके पोखरी दुवै क्षेत्रवासीलाई वधाइ दिएका छन्।