एसोसिएसन फर रिसर्च अन् नन्प्रफीट अर्गनाइजेसन्स एन्ड वल्युन्टेरी एक्टिविटिज आरनोवाद्वारा भर्खरै दिवङ्गत भएका चर्चित अभिनेता सुनील थापा “राते काइँला”को आत्मिक चिर शान्तिको लागि आइतबार शोक सभाको आयोजन गरेको थियो। चम्पासरी-मिलन मोडको सिसाबारी सिल्भर डेलमा आरनोवाका सल्लाहका, डा. जीवन राणाको अध्यक्षतामा आयोजित सभा दुई चरणमा आयोजन गरिएको थियो। पहिलो चरणमा अभिनेता सुनील थापाको आत्मिक शान्तिको लागि एक मिनटको मौनता धारण गरियो। सचिव दिवाकर शर्मा ढुङ्गेलद्वारा सञ्चालित शोकसभामा उपाध्यक्ष सन्तोषमणि राई, सहसचिव लादोर्जे तामाङ विनोद, कार्यकारी सदस्यहरू सङ्गीता राई, सञ्जीव श्रीमल, रीना सुब्बाले सुनील थापाको बारेमा आ-आफ्नो वक्तव्य दिएका थिए।
सभाको दोस्रो चरणमा आरनोवाद्वारा आगामी १५ फरवरी आइतबार बिहान साडे छ बजे बरिष्ठ नागरिकहरूको सम्मानमा आयोजित स्वास्थ्य कार्यक्रममाथि छलफल गरिएको थियो। उक्त कार्यक्रममा चम्पासरी- मिलन मोड रोडको बाबुबासा अवस्थित दुर्गा मन्दिरको अघिबाट सिसाबारीको त्रिवेणी संस्कृत विद्यापीठ अघिसम्म बरिष्ठ नागरिकहरूलाई पदयात्रा गराइनेछ। समापनमा बरिष्ठ नागरिकहरूलाई सम्मान-पत्र प्रदान गरिनेछ। अहिलेसम्म बीसजना बरिष्ठ नागरिकहरूले सहभागिताको लागि आफ्नो नाम दर्ता गराइसकेका छन्। जसमा चौरासी वर्षीय डीके छेत्री पनि समावेश रहेका छन्।
सभामा डा. जीवन राणाको बाल गीतहरूको पुस्तक प्रकाशित गरिएकोमा उनलाई आरनोवाको पक्षबाट सचिव दिवाकर शर्मा ढुङ्गेलद्वारा वधाइ र शुभकामना दिइयो।
कार्यकारी अध्यक्ष मेनका तामाङको बरिष्ठ नागरिकहरूको पदयात्रा आयोजन गराउने सोचको प्रशन्सा गर्दै यसपटक सानो भए पनि अब उसो प्रति वर्ष व्यापकरुपमा पदयात्रा आयोजन गर्ने सुझाउ सहसचिव लादोर्जे तामाङले दिए, जुन विषयलाई सभाध्यक्षलगायत सबैले स्वागत जनाउँदै सर्वसम्मतिले प्रस्ताव पारित गरियो।
