दार्जीलिङ,19 दिसम्बर(निसं): 313 शिक्षकहरूको मुद्दाबारे अनित थापा शुक्रबार कोलकाता प्रस्थान गर्ने भएको कुरा राख्दै भावनाले होइन, बुद्धिले राजनीति गरौं भनी जीटीए (गोर्खाल्याण्ड टेरिटोटियल एड्मिनिस्ट्रेसन) चिफ एक्ज्युकेटिभ अनित थापाले बताएका छन्। अनित थापाले भनेका छन्, 313 जना शिक्षकहरूको नियुक्ति अवैध ठहरिएको कोलकाता हाई कोर्टको आदेशले स्थानीय क्षेत्रमा चर्को असन्तुष्टि उत्पन्न गरिरहेकै बेला जीटीए प्रमुख अनित थापाले शिक्षकहरूको पक्षमा निर्णायक पहल थालेका छन्। उनले भनेका छन्, भोलि नै कोलकाता जाँदैछु, मैले सरकारसँग छलफल गरिसकेकोछु। यो मुद्दा हामी राजनीतिक र कानुनी दुवै मोर्चामा लड्नेछौं।
थापाले, बिहिबार दार्जीलिङ आयोजित शिक्षक प्रतिनिधिसँगको भेटमा आन्दोलनरत शिक्षकहरूलाई सम्बोधन गर्दै भने, 313 जनाको यो लडाइँ न्यायको लडाइँ हो। राजनीति गर्नु पर्छ, तर गाँस खाने राजनीति गर्नु हुँदैन। पहाडमा गाँस दिनेभन्दा खोस्ने धेरै छन्।
उनले थपे, तपाईंहरूको लडाइँ म पहिले पनि लडेको हुँ, आज पनि लड्नेछु। कोर्ट र सरकारले आफ्नो काम गरिरहेका छन्, तर यो अवस्था ल्याउनेहरू नै दोषी हुन्। हाम्रो समयमा उठेको समस्या हाम्रो समयमा समाधान हुनेछ। थापाले आन्दोलनरत शिक्षकहरूलाई धैर्य र विवेक कायम राख्न आग्रह गर्दै भने, अब हृदयले होइन, दिमाग लगाएर राजनीति गर्नु पर्छ। पैसा छ भन्दैमा अर्काको गाँस खोस्ने कुरामा पैसा हाल्नु हुँदैन। अन्ततः त्यही पैसाले उसलाई पिरोल्ने छ। जीटीए प्रमुखले 313 शिक्षकहरूको नियुक्ति र वैधानिकताको विषयमा पश्चिम बंगाल सरकारका उच्च अधिकारीहरूसँग भेटवार्ता गर्ने तयारी भएको जनाएका छन्। उनले दृढ स्वरमा भने, हाम्रो कानुनी लडाइँ जारी छ। शिक्षकहरू हतास नबन्नुहोस्, कुरा सकिएको छैन, सुरू भएको मात्रै हो।
यसैबीच, आन्दोलनकारी शिक्षकहरूको सङ्गठनले अनिश्चितकालीन विद्यालय बन्दका क्रममा आगँहको रणनीति तयार पार्दै दार्जिलिङबाट न्यायका लागि पहाड एकजुट अभियान निरन्तरता दिइरहेको जनाएकोछ।
