दार्जीलिङ,2 अक्टोबर(निसं): जोरबङ्लो-सुखियापोखरी खण्ड अन्तर्गत पश्चिम बंगाल ग्रामीण विकास विभाग, दार्जीलिङ डिभिजन-द्वारा आयोजित रघुबीर बस्ती देखि धनबीर बस्ती हुदै सुनवार बस्तीसम्म पुग्ने 5.04 किलो मिटर सडक निमार्ण कार्यको शिलान्यास कार्यक्रममा भारतीय गोर्खा प्रजातान्त्रीक मोर्चा(भागोप्रमो)-का महासचिव अमर लामाले भारती जनता पार्टी(बीजेपी)-प्रति कटाक्ष गर्दै इन्टरलोक्युटर , बीजेपी अनि गोर्खालाई दिईएको वचन माथि प्रतिक्रिया दिँदै भने, “हाम्रो एकजना विधायकले घरी घरी भन्थे कि दिल्लीमा केही पाक्दैछ। अहिले के पाक्दैछ भनी हाल्नु हुँदैन। दुश्मन लाग्छ।
अनि अलिक पछि उनले भने खिर पाक्दैछ। सबैले थप्पडी पनि बजाए। धेरैले पत्याए पनि। तर हामीले पत्याएनौं। उनीहरू ( बीजेपी) माथी हामी यो जुनीमा पत्याउनेवाला छैनौं। बरु राजनीति छोड्नेछौ तर केन्द्रको सत्तासिन दल (बीजेपी) लाई पत्याउने छैनौं। इन्टरलोक्युटर भनेको सौदा गर्नु अघि के के ल्याउने हो त्यो सूची तयार गर्ने व्यक्ति हुन। तर यहाँ त खिर पाक्दैछ भन्थे। के भयो त्यो खीर को कि आफै घोप्टाइ पठायो?”प्रश्न चिन्ह छ।
गतको चुनाउमा मोदी चामलको नाममा भोट मागेको कुरा निकाल्दै लामाले भने, “यिनीहरूले दिनु त केही सक्दैन। राशनको कुरा पनि फेरि आउनु थालेको छ। सरकारले राशन दिने प्रथा प्रधानमन्त्री पण्डित नेहरूको समय देखिको हो। जब डा. मनमोहन सिंह प्रधानमन्त्री थिए। त्यो समय खाद्य सुरक्षा योजना अन्तर्गत निःशुल्क राशन वितरण हुनु थालेको हो। बीजेपीको दया मायाले दिएको चामल चाहिँ होईन। 21औं शताब्दीमा पनि हामी चामलको नाममा भोट हाल्छौ। यो भन्दा ठूलो ठूलो कुरा बीजेपी-ले दिनु सक्छ।
तर दिने कुनै छाँटकाँट छैन। इन्टरलोक्युटर-मा नै भुलाई राखेको छ। गठबन्धन मुद्दा तय गर्नु नसकेर अन्योलमा छन्।”
असाममा 6 जात गोष्ठीलाई जनजातिको दर्जा दिने निणर्य को उल्लेख गर्दै लामाले भने, “हिजो मात्र आसामको बीजेपी सरकारले विधान सभामा 6 जात गोष्ठीलाई जनजातिको दर्जा दिने प्रस्तावलाई अनुमोदन गर्यो। त्यही पार्टी ( बीजेपी) ले गोर्खाको छोडिएको 11 जातगोष्ठीलाई जनजाति दिन्छु भनेर वचन दिएको कति वर्ष भयो। तर आज सम्म यस मुद्दा एक कदम पनि अघि बढेको छैन। यसपालिको चुनाउमा भोट माग्नु बीजेपीले यो मुद्दालाई फेरि उठाउनेछ। हामी होसियार बन्नुपर्छ।”
एसआईआर-को फारम समयमा वुझाउने अपील गर्दै उनले भने, “भारतीय चुनाउ आयोगले एसआईआर फारम बुझाउने गत 4 डिसेम्बर देखि बढाएर 11 डिसेम्बर बनाएको छ। मिति बढायो भन्दैमा पर्खी रहने काम नगर्नु।गत 11 डिसेम्बरपछि पहिलो मतदाता सूची निस्कन्छ। यदि कसैकाे पहिलो ड्राफ्ट मतदाता सूचीमा नाम छुट्न गए सुनवाई को पहल सुरू हुनेछ। त्यो सुनवाई समय यदि कसैलाई समस्या भए हाम्रा शाखा, समष्टिका जानकारहरूले सहयाेग गर्नेछन्।” शिलान्यास गरिएको बाटो निर्माण कार्यको लागत रकम 536.58 लाख रहेको छ।
