अभागोवि महासंघद्वारा जीटीए प्रमुखलाई ज्ञापन

अखिल भारतीय गोर्खा विद्यार्थी महासंघ तीनधारे महानदी समष्टिको प्रतिनिधि टोली दार्जीलिङको लालकोठी पुगेर गोर्खाल्याण्ड क्षेत्रीय प्रशासनको प्रमुख कार्यपाल अनित थापालाई भेटेर विभिन्न समस्याहरु विषयमा ज्ञापन पत्र बुझाएको छ। उक्त प्रतिनिधि टोलीले जीटीए प्रमुख अनित थापा र स्वास्थ्य विभागको कार्यकारी निर्देशकसित भेट गरी घैयाबारी अस्पतालमा फार्मसिस्टको अभाव विषयमा अवगत गराउँदै ज्ञापन दिन्दै फार्मसिस्टको अभावले जनसाधारण समस्यामा परेको र यस विषयमा झट्टै पहल गर्दै घैयाबारी अस्पतालमा एकजना फार्मसिस्टको नियुक्त गरिदिने निवेदन गरेको छ। त्यसरी नै तीनधारे‌मा निर्माण गरिएको विद्यालय भवन त्यसै रहिरहेकोले उक्त भवनको पनि प्रयोग गरिदिने विषयमा ज्ञापनपत्रमा उल्लेख गरिएको छ। टोलीको तर्फबाट आगामी 23 अगस्तको दिन समष्टि स्तरीय भाषा मान्यता दिवस समारोह पालन गर्दै दशौँ र बाह्रौं श्रेणीको बोर्ड परीक्षामा उत्तीर्ण विद्यार्थीहरुलाई सम्बर्द्धना जनाइने अखिल भारतीय गोर्खा विद्यार्थी महासंघ तीनधारे महानदी समष्टिको सभापति सुभम प्रधानले जानकारी दिएका छन्।