दुधे ह्युम पाइप पुलः राजनैतिक नाटकीकरणमा विश्व रेकर्ड

विधायक निरज जिम्बाले एक प्रेस विज्ञप्तिमा उल्लेख गरेका छन्, मुख्यमन्त्रीको पछिल्लो सामाजिक सञ्जालको पोस्टमा दुधे क्षेत्रमा बनेको “ऐतिहासिक” ह्युम पाइप पुलको उद्घोष यस्तो ढङ्गले गरिएको छ, मानौं पश्चिम बंगालले विश्वको आठौँ आश्चर्य निर्माण गरेको हो। विवरण पढ्दै जाँदा थाह हुन्छ ,यो त ४६८ मिटर लामो, १३२ ह्युम पाइपले बनेको एउटा भेन्टेड कजवे मात्रै रहेछ। १६ दिनको श्रमलाई अहिले “रेकर्ड ब्रेकिङ उपलब्धि” का रूपमा प्रस्तुत गरिएको छ । साँच्चै, ममता ब्यानर्जीको शासनमा सामान्य कुरालाई असाधारण बनाउने कला पराकाष्ठामा पुगेको छ , ह्युम पाइपलाई हेडलाइनमा रूपान्तरण गर्ने कला। तर प्रश्न उठ्छ, यस्तो सामान्य कार्यको “उपलब्धि” किन मुख्यमन्त्री आफैले घोषणा गर्नुपर्‍यो ? के यो पुलको श्रेय कम्तिमा पनि यसको भौगोलिक क्षेत्राधिकारभित्र पर्ने जीटीए (GTA) लाई दिइनु हुँदैनथ्यो? तर, “सहकारी संघियता”,मुख्यमन्त्रीको मनपर्ने “तकिया शब्द” , सधैं त्यतिबेला मात्र याद आउँछ जब केन्द्र सरकारलाई दोष दिनु पर्छ, नकि जब स्थानीय निकायलाई श्रेय दिनुपर्ने हुन्छ। आजको युगमा जहाँ समुद्रमाथि पुल र पहाड मुनि सुरुङहरू निर्माण भइरहेका छन्, त्यहाँ बंगाल भने नदीमाथि पाइप बिछ्याएकोमा उत्सव मनाइरहेको छ। निःसन्देह, यो पनि एउटा विश्व रेकर्ड हो , निर्माणमा होइन, राजनैतिक नाटकीकरणमा। त्यसैले, वधाइ अवश्य दिनु पर्छ। पुलको निम्ति होइन, त्यो शब्दको पुलको निम्ति , जसले आत्मप्रशंसा र प्रतीकवादबीच सम्बन्ध जोडिदिन्छ।