त्रिपुरा विवि गोर्खा परिवारद्वारा भाषा दिवस पालन

त्रिपुरा विश्वविद्यालय गोर्खा परिवारले भाषा दिवस विशेष उत्साहका साथ पालन गरेको थियो। कार्यक्रममा त्रिपुरा विश्वविद्यालयका कुलपति प्रा. गंगाप्रसाद प्रसाईंको नेतृत्व प्रेरणादायी रह्यो। प्रा. प्रसाईंले सम्बोधन गर्दै भने, “गोर्खा भएकोमा गर्व गरौं। हाम्रो नेपाली भाषाले सन् १९९२ मा भारतीय संविधानको आठौं अनुसूचीमा सूचीकृत भई आधिकारिक मान्यता प्राप्त गरेको छ।” उनले सिक्किमका पूर्वमुख्यमन्त्री स्व. नर बहादुर भण्डारी अनि तत्कालीन सांसद दिलकुमारी भण्डारीको योगदान सम्झनु भयो, जसले नेपाली भाषालाई मान्यता दिलाउन महत्वपूर्ण भूमिका खेलेका थिए। प्रा. प्रसाईंले छात्र–छात्रालाई पठाइएको तत्कालीन सांसद दिलकुमारी भण्डारीको भीडीयो सन्देशको लागि आभार व्यक्त गर्नुभयो। भीडीयोमा भण्डारीले भाषाअन्दोलनका क्रान्तिकारीहरूले दिएका बलिदानको स्मरण गराएको थियो र युवापुस्तालाई आफ्नै भाषालाई जोगाउन प्रेरित गरेको थियो।
कार्यक्रममा नृत्य, संगीत, कविता वाचनसहित नेपाली भाषालाई मान्यता दिलाउन गरिएको ऐतिहासिक तथा राजनीतिक आन्दोलनका विषयमा समेत मन्तव्य प्रस्तुत गरियो। कुल २६ जना गोर्खा समुदायका सहभागीमध्ये पाँचजना विश्वविद्यालयका प्राध्यापक र बाँकी स्नातकोत्तर तहका विद्यार्थी र शोधार्थी रहेका थिए।
भाषा दिवस मात्र नभई त्रिपुरा विश्वविद्यालयका गोर्खा परिवारले सन् २०२१ देखि भानु जयन्ती पनि निरन्तर मनाउँदै आएको छ। यस परम्पराको सुरुआत हालका कुलपतिले गर्नुभएको हो र उनीहरूले यो परम्परा भविष्यका पुस्ताका विद्यार्थी र अध्यापकहरूका लागि निरन्तरता दिने प्रतिबद्धता समेत व्यक्त गर्नुभएको छ।