मिरिकमा पहाडका कविहरूलाई लिएर क्याफे दी कविताको आयोजना आइतबार गरियो। एभरेष्ट क्याफेको तत्वावधानमा आयोजित कार्यक्रममा दार्जीलिङ, खरसाङ, सुकना, बिजनबारी, मिरिक, पशुपति लगायत स्थानीय कविहरूको उपस्थिति रहेको थियो। अरबिन्द गुरूङ अनि तिथङ्कर गुरूङको प्रायोजनमा आयोजित कार्यक्रमको प्रमुख संयोजक पत्रकार एवं कवि प्रवेश हाङखिम रहेका थिए। पत्रकार तथा कवि मुस्कान खेसहाङले सञ्चालन गरेको कार्यक्रममा भारतीय नेपाली साहित्यका दिवंगत साहित्यकार उर्मिला घिसिङको आत्मा शान्तिको कामना गर्दै एक मिनटको मौन पालन गरियो। त्यसपछि कविहरू, महेन्द्र स्याङ्बो,पासाङ लक्की शेर्पा, कविता राई गाउँले, हनोक थापा, आरती ठकुरी, प्रभात राई चिसो, विनीता छेत्री, विजय वान्तवा कैलाशी, नुहाङ राई, कमला तामाङ, शान्त प्रकाश राई आदिले कविता अनि गजल वाचन गरेका थिए।