जीटीए भाषा मान्यता दिवस आयोजन समिति गठित

नेपाली भाषा मान्यता दिवसलाई केन्द्र गरेर सूचना एवम् सांस्कृतिक विभाग, गोर्खाल्यान्ड क्षेत्रीय प्रशासनको पहलमा तथा जीटीएका मुख्य कार्यपाल अनित थापाको निर्देशन तथा सुझावमा यसपालि कालेबुङ जिल्ला स्तरीय अन्तर विद्यालय कविता लेखन एवम् वाचन प्रतियोगिता साथै भाषा दिवस कार्यक्रम हुने भएको छ। शुक्रबार कालेबुङको जीटीए शाखा सचिवालय विभागका कार्यकारी सभासद अनोस थापाको उपस्थितिमा सभासदगण, पञ्चायत समितिका सभापतिहरू, थिङकर्स फर कालेबुङ लिटरेचर एण्ड कल्चरल सेलका प्रतिनिधिहरू, पीआरओ लगायत अन्यको उपस्थितिमा सभा बसेर यसबारे छलफल गरिएको छ। कालेबुङ जिल्लाभरिका तेह्रवटा समष्टिहरूमा रहेको माध्यमिक, उच्च माध्यमिक, आइसीएससी, आइएससी विद्यालयका विद्यार्थीहरूमाझ स्वरचित कविता लेखन तथा वाचन कार्यक्रम हुने तथा भाषा मान्यताबारे कार्यक्रम गर्ने हेतुले समिति पनि गठन गरिएको छ।