गोर्खासङ्गै 7 समुदायलाई ‘संरक्षित वर्ग’को मान्यता

जग्गा अधिकारसम्बन्धी दीर्घकालीन माग सम्बोधन गर्न असम मन्त्रिपरिषद्ले ऐतिहासिक तथा समावेशी निर्णय गर्दै तीनसुकिया जिल्लाको तिराप जनजातीय क्षेत्र र ब्लकमा (Tirap Jagun Tribal Belt & Block) गोर्खा लगायत सात जातीय समुदायलाई १८८६ को असम भू-राजस्व ऐनको धारा १६०(२) अन्तर्गत ‘संरक्षित वर्ग’ (Protected Class) को रूपमा मान्यता दिने निर्णय गरेको छ। बिहीबार सम्पन्न मन्त्रिपरिषद् बैठकपश्चात् निर्णयको घोषणा गर्दै मुख्यमन्त्री डा. हिमन्त विश्व शर्मा‌ले भने, “क्याबिनेटले तिराप जनजातीय क्षेत्रमा अहोम, मटक, मोरान, चुटिया, गोर्खा, चिया बगान जनजाति तथा आदिवासी समुदायलाई संरक्षित वर्ग अन्तर्गत समावेश गर्ने निर्णय गरेको छ। यसले २०११ भन्दा अगाडि देखिको बसोबासलाई आधार मानेर त्यहाँका मानिसहरूलाई जग्गा स्वामित्वको अधिकार सुनिश्चित गर्नेछ।”