तराई खण्डमा अत्याधिक गर्मी बडेपछि मिरिकको शीतल वातावरणमा समय बिताउन धेरै पर्यटकहरू मिरिक पर्यटन केन्द्रमा आइरहेका छन्। मिरिकमा शुक्रबार पानी परेपछि शीतल वातावरण बनेको थियो। फलस्वरूप मिरिक पर्यटन केन्द्रमा पनि पर्यटकहरूको चहल पहल बडेको देखियो। पर्यटकहरूको आगमन बडेपछि यहाँको होटल अनि रेस्तुराँहरूमा पर्यटकहरूको चहल पहल अधिक देखियो भने मिरिक फूलबारी, हेलीप्याट, बोकार मोनस्ट्री आदि ठाउँहरूमा पनि पर्यटकहरूले घुमफिर गरिरहेको देखियो। मिरिक पर्यटन केन्द्रको मुख्य आकर्षण मिरिक झीलमा चल्ने नौका पर्यटकहरूको लागि मुख्य आकर्षण बन्न पुगेको थियो। मिरिक झीलमा चल्ने शिकारा अनि पेयडल नौकामा पर्यटकहरू सवारी गरेर मिरिकको शीतल वातावरणको आनन्द उठाइरहेका थिए। मिरिक पर्यटन केन्द्रमा घुम्न आउने पर्यटकहरूले घोडा सवारी, जातीय भेषभूशा लगाएर मनोरन्जन गरिरहेका थिए भने यहाँ रहेको थ्री सिक्सटी सेल्फी बुथमा रिल बनाउनेहरूको संख्या पनि अधिक रहेको थियो। मिरिकको शीतल वातावरणमा समय विताउन पाउँदा अति आनन्दित लागेको आसमबाट आएका एक पर्यटकले जानकारी गराउँदै मिरिक पर्यटन केन्द्रमा घुम्न आउँदा कुनै असुविधा नभएको अनि मिरिक पर्यटन केन्द्र सुन्दर र ब्यावस्थित रहेको बताए।
