रिम्बिक,20 जून(निसं): रिम्बिक-लोधोमा क्षेत्र कृषिको निम्ति परिचित स्थल भएपनि हाल यो क्षेत्रमा बाँदरहरुको उपद्रवले कृषि व्यवसायमा रहेका कृषकहरु हैरान भएका छन्। स्थानीय कृषकहरुको भनाइ अनुसार, यहाँ अधिकांश मानिसहरु कृषि गर्छन्। आलु, इस्कुस , मकैसहित साग-सब्जीहरु प्रचुर मात्रामा उत्पादन हुने गर्छ। बर्षको यो समय मकैको बाली उठाउइने गरिन्छ। तर बढ्दो बाँदरको रगरगीका कारण कृषकहरु दिक्क बनेका छन्। हुलका हुल बाँदरहरु खेतमा पस्ने भएकाले सम्पुर्ण बाली नष्ट भइरहेको छ। यस्तोमा कतिपय कृषकहरुले बन बिभागतिर गुहार लगाइरहेका छन्। स्थानीयहरु दिनदिनै कृषि व्यवसायबाट बिमुख बनिरहेको अवस्थामा यसरी बन्य जन्तुहरुको उपद्रवका कारण कृषकहरुमा निराशाजनक प्रभाव परिरहेको छ। एक स्थानीय कृषकले बताए अनुसार, बाली तयार हुन नपाई बाँदर, दुम्सी, मृग लगायतका वन्य जन्तु लाग्ने गरेको छ जस कारण फसल पुर्ण रुप बर्बाद भइरहेको छ। यस्तोमा स्थानीयहरुले अनेक उपायहरु लगाईरहेका छन् तैपनि बदमासी नियन्त्रण भने भइरहेको छैन।
स्थानीय कृषकहरुले विभाग अनि क्षेत्रीय प्रशासनलाई यस प्रकारको वन्यजन्तुको उपद्रवदेखि सुरक्षा गरिदिने अनुरोध गरेका छन्।यस्ता फसल नष्ट गरिदिने वन्यजन्तुहरुको रगरगीलाई रोकथामको निम्ति पनि कृषकहरुले अनुरोध गरेका छन्।
