गोर्खा राष्ट्रिय मुक्ति मोर्चा (गोरामुमो) ले आफ्नो संगठनात्मक विस्तारलाई निरन्तरता दिँदै वरिष्ठ अधिवक्ता तथा पूर्व विधायक प्रणय राईलाई पार्टीमा स्वागत गरेको छ। गोरामुमो केन्द्रीय कार्यालय, दार्जीलिङमा आयोजित समर्थन कार्यक्रमबीच पार्टी अध्यक्ष मन घिसिङको प्रमुख उपस्थितिमा प्रणय राई औपचारिक रूपमा गोरामुमोमा सामेल भएका हुन्।
पार्टीका मिडिया सेल प्रभारी दिनेश साम्पाङका अनुसार प्रणय राईको नेतृत्वमा विभिन्न राजनीतिक दल परित्याग गरी करिब १०० घरपरिवार गोरामुमोमा आबद्ध भएका छन्। यसका साथै तृणमूल कांग्रेस दार्जीलिङ जनरल सहसचिव देवेन्द्र घतानी तथा उनका समर्थकहरू समेत गोरामुमोमा प्रवेश गरेका छन्।
कार्यक्रममा अध्यक्ष मन घिसिङले नयाँ सदस्यहरूलाई खादा ओढाएर स्वागत गर्दै जातीय अस्तित्व र मातृभूमिको सुरक्षाका लागि सबै गोर्खाहरू एकजुट हुनुपर्ने आवश्यकता औंल्याए। उनले भने, “यो केवल कुनै राजनीतिक दलको विषय होइन, यो हाम्रो जाति र माटोको प्रश्न हो। जाति र माटो सुरक्षित भएपछि सबैले आफ्नो विचार र राजनीतिक बाटो रोज्न सक्छन्। आज गोरामुमोमा सामेल भएका सम्पूर्ण सदस्यहरूलाई हार्दिक स्वागत गर्दछु।”
यस अवसरमा गोरामुमोका संस्थापक अध्यक्ष सुवास घिसिङको तस्बिरमा दीप प्रज्वलन गरेपछि प्रणय राईले आफू कुनै पद वा लाभको अपेक्षाले नभई आफ्नो “मूल घर” फर्किएको बताए। उनले भने, “म पार्टीबाट केही प्राप्त गर्ने उद्देश्यले आएको होइन। म आफ्नो मूल घरमा फर्किएको हुँ। अब हामी सबैले जाति र माटोको उन्नति, अधिकार र सम्मानका लागि एकजुट भएर काम गर्नुपर्छ। मेरो आगामी राजनीतिक यात्रा जाति र माटोको उत्थानका लागि समर्पित रहनेछ।” गोरामुमोले प्रणय राईजस्ता अनुभवी राजनीतिक व्यक्तित्व तथा अधिवक्ताको पार्टी प्रवेशले संगठनलाई थप मजबुत बनाउने विश्वास व्यक्त गरेको छ। राजनीतिक वृत्तमा यस घटनालाई दार्जिलिङ पहाडको समसामयिक राजनीतिमा महत्त्वपूर्ण विकासका रूपमा हेरिएको छ।
