गोर्खा राष्ट्रिय मुक्ति मोर्चा दार्जीलिङ ब्राञ्च कमिटी अन्तर्गत रिम्बिक–लोधोमा समष्टिको लोधोमा ग्राम पञ्चायत–२ अन्तर्गत पर्ने फेन्चेटार बीच गाउँमा पार्टीको संगठन विस्तार अभियानलाई थप मजबुत बनाउँदै नयाँ प्रशाखा कमिटी गठन गरिएको छ।
दिलबहादुर लिम्बूको अध्यक्षतामा सम्पन्न भएको उक्त सांगठनिक सभामा पार्टीको विचारधारा, छैटौं अनुसूचीको माग तथा जनहितका मुद्दाहरूलाई लिएर विस्तृत छलफल गरिएको थियो। सभामा स्थानीय स्तरमा संगठनलाई अझ सशक्त बनाउने, पार्टी गतिविधिलाई गाउँ–गाउँसम्म पुर्याउने तथा युवापुस्ताको सहभागिता बढाउने विषयमा विशेष जोड दिइएको थियो।
यस अवसरमा विभिन्न राजनीतिक दलसँग आबद्ध रहेका स्थानीय नेता तथा समर्थकहरूले गोरामुमोको नीति, सिद्धान्त र कार्यशैली माथी विश्वास व्यक्त गर्दै पार्टीमा औपचारिक रूपमा प्रवेश गरेका छन्। नवप्रवेशीहरूलाई पार्टीको झण्डा तथा खादा ओढाएर स्वागत गरिएको थियो।समष्टि अध्यक्ष पेम्बा भुटियाले फेन्चेटार क्षेत्रमा गोरामुमोप्रति जनसमर्थन दिनप्रतिदिन बढ्दै गएको बताउँदै अन्य राजनीतिक दलका कार्यकर्ता तथा समर्थकहरू समेत गोरामुमोमा सामेल भइरहेका जानकारी दिए। उनले पार्टीको संगठन विस्तार अभियानलाई अझ तीव्र बनाउँदै प्रत्येक गाउँ र बस्तीमा गोरामुमोको उपस्थिति सुदृढ गरिने बताए।
स्थानीय कार्यकर्ताहरूको उत्साहजनक सहभागिताबीच सम्पन्न उक्त सभाले फेन्चेटार क्षेत्रमा गोरामुमोको संगठनात्मक आधार थप बलियो बनेको तथा पार्टीप्रति जनविश्वास र समर्थन निरन्तर बढिरहेको स्पष्ट संकेत दिएको छ।
