गोर्खा राष्ट्रिय मुक्ति मोर्चा दार्जीलिङ ब्राञ्च कमिटी अन्तर्गत रंगबुल –धोतरिया –रंगबुक समष्टिको अप्पर कलेज भेल्ली शाखा कमिटीलाई पुनर्गठन गरियो। जसको नयाँ कार्यसमिति गठन गरिएको छ। संगठनलाई अझ सुदृढ, सक्रिय र जनमुखी बनाउने उद्देश्यले पुरानो शाखा कमिटी विघटन गरी नयाँ नेतृत्व चयन गरिएको पार्टीका मिडिया सेल प्रभारी दिनेस साम्पाङले जानकारी दिएका छन्। पुरानो गाउँ, पाँचधुरे, अफिस गाउँ तथा बीच गाउँ क्षेत्रलाई समेटेर गठन गरिएको नवगठित अप्पर कलेज भेल्ली शाखा कमिटीमा सर्वसम्मतिबाट बली राम लेप्चालाई अध्यक्ष, सदिप राईलाई उपाध्यक्ष, सचिन राईलाई मूल सचिव, अशोक स्याङ्बोलाई सह–सचिव तथा नरसिंह राईलाई कोषाध्यक्ष चयन गरिएको छ। त्यसैगरी नितेस बिके र निर्मल छेत्रीलाई कार्यसमिति सदस्यको जिम्मेवारी प्रदान गरिएको छ। यसैगरी शाखा कमिटीका प्रमुख सल्लाहकारहरूमा धनप्रसाद राई, राजेन राई, प्रेमकुमार राई, कान्छा राई, बिमल प्रधान तथा अम्बर सिंह तामाङलाई चयन गरिएको छ।
नवगठित शाखा कमिटीका प्रतिनिधिहरूले आज गोरामुमो केन्द्रीय कार्यालयमा पार्टी अध्यक्ष मन घिसिङसँग शिष्टाचार भेटघाट गर्दै संगठन विस्तार, जनसम्पर्क अभियान तथा भावी राजनीतिक रणनीतिका विषयमा विस्तृत छलफल गरेका थिए। उक्त अवसरमा अध्यक्ष मन घिसिङले नवगठित कमिटीका पदाधिकारी तथा सदस्यहरूलाई खदा लगाएर बधाई तथा शुभकामना व्यक्त गर्दै संगठनको सिद्धान्त, अनुशासन र जनसेवाको भावनालाई आत्मसात गर्दै कार्य गर्न आह्वान गरे। उनले जाति र माटोको अधिकार, पहिचान तथा समग्र गोर्खा समुदायको हितका लागि संगठनलाई गाउँ–गाउँसम्म विस्तार गर्दै जनविश्वासलाई अझ बलियो बनाउनुपर्नेमा जोड दिए।नवगठित अप्पर कलेज भेल्ली शाखा कमिटीले पनि पार्टी नेतृत्वप्रति पूर्ण प्रतिबद्धता जनाउँदै संगठन सुदृढीकरण, कार्यकर्ता विस्तार तथा जनसरोकारका मुद्दाहरूलाई प्राथमिकताका साथ अघि बढाउने संकल्प व्यक्त गरेको छ। यस पुनर्गठनलाई समष्टि क्षेत्रमा गोरामुमोको संगठनात्मक अभियानलाई थप गति प्रदान गर्ने महत्वपूर्ण कदमका रूपमा हेरिएको छ।
