सुकेपोखरी गुम्बामा सागा दावा पर्वका अवसरमा विशेष पूजा तथा त्रिपिटक परिक्रमा सम्पन्न

सुके क्षेत्रको प्रमुख धार्मिक केन्द्रका रूपमा परिचित सुकेपोखरी कृति ग्यादेन टाँशी छ्योलिङ गुम्बामा बौद्ध धर्मको पवित्र महिना तथा पर्व सागा दावाका अवसरमा सञ्चालन गरिएको महिनाभरि पूजा–अर्चना तथा धार्मिक कार्यक्रमहरू सम्पन्न भएका छन्। सागा दावा पर्वलाई बौद्ध धर्मावलम्बीहरूले विशेष श्रद्धा र भक्तिभावका साथ मनाउने परम्परा रहिआएको छ। यस अवसरमा गुम्बामा विभिन्न धार्मिक अनुष्ठान तथा प्रार्थना कार्यक्रमहरू आयोजना गरिएको थियो। सागा दावा पूर्णिमाका दिन विश्व शान्तिको कामना गर्दै गुम्बाको आयोजनामा बौद्ध धर्मग्रन्थ त्रिपिटकको सुके बजार परिक्रमा गरिएको थियो। उक्त कार्यक्रममा सुकेपोखरी तथा आसपासका क्षेत्रका बौद्ध धर्मावलम्बी र स्थानीय नागरिकहरूको उल्लेखनीय सहभागिता रहेको थियो। आलक ताकलुड रिम्बुचेको अगुवाइमा सम्पन्न कार्यक्रमअन्तर्गत त्रिपिटकलाई बजार परिक्रमा गराएपछि गुम्बामा विधिवत् पूजा–अर्चना तथा धार्मिक अनुष्ठानहरू सम्पन्न गरिएको आयोजक पक्षले जनाएको छ।