अपर दिलाराम लोकेशन गाउँमा गोरामुमोको सांगठनिक सभा सम्पन्न, स्थानीयवासीले हरियो झण्डाप्रति प्रतिबद्धता जनाए।

उक्त सभामा केन्द्रीय समिति सदस्या अमृता थापा, गोरायुमो केन्द्रीय समिति संयोजक आनन्द राई, खर्साङ महकुमा एचपीडब्ल्यु अध्यक्ष अदिप राई, खर्साङ महकुमा समिति प्रचार–प्रसार सचिव भुपेन गुरुङलगायत विभिन्न तहका नेताहरूको उपस्थिति रहेको थियो। कार्यक्रमको सञ्चालन खर्साङ महकुमा गोरायुमो सचिव सन्तोष सुब्बाले गरेका थिए।

सभामा लोकेशन क्षेत्र तथा आसपासका गाउँका हरियो झण्डा समर्थक सदस्यहरूको उल्लेखनीय उपस्थिति रहेको थियो। सहभागीहरूले गोर्खा समुदायको अधिकार, पहिचान तथा क्षेत्रीय हितको संरक्षणका लागि गोरामुमोको नेतृत्व र पार्टीको नीतिप्रति आफ्नो समर्थन निरन्तर रहने प्रतिबद्धता व्यक्त गरेका थिए।

वक्ताहरूले आफ्नो सम्बोधनका क्रममा गोर्खा जातिको दीर्घकालीन राजनीतिक पहिचानको सवाल तथा क्षेत्रीय स्वाभिमानको रक्षामा गोरामुमोले निर्वाह गर्दै आएको भूमिकाबारे प्रकाश पारे। उनीहरूले संगठनलाई अझ सशक्त बनाउँदै जनतासँग प्रत्यक्ष सम्पर्क विस्तार गर्नुपर्ने आवश्यकतामा जोड दिएका थिए। सभामा उपस्थित सम्पूर्ण नेतृत्वले आ–आफ्नो मन्तव्य राख्दै संगठन विस्तार, युवा सहभागिता वृद्धि तथा जनआधारित आन्दोलनलाई थप बलियो बनाउने विषयमा विचार व्यक्त गरेका थिए। कार्यक्रम सौहार्दपूर्ण वातावरणमा सम्पन्न भएको जानकारी प्राप्त भएको छ।