हिमाचल प्रदेशमा भीषण सडक दुर्घटना, दुई बालबालिकासहित ८ पर्यटक बेपत्ता

हिमाचल प्रदेशको चम्बा जिल्लास्थित जोखिमपूर्ण बैरागढ–साच पास–किल्लार सडकखण्डमा भएको भीषण सडक दुर्घटनामा दुई बालबालिकासहित ८ जना पर्यटक बेपत्ता भएका छन्। प्रारम्भिक जानकारी अनुसार पर्यटक बोकेको एक ट्याक्सी गाडी गहिरो भीरमा खसेपछि उक्त घटना भएको हो। दुर्घटनामा परेका अधिकांश पर्यटक बेंगलुरुका रहेको बताइएको छ भने गाडीमा स्थानीय चालकसहित कुल ८ जना सवार थिए। दुर्घटना शुक्रबार राति भएको अनुमान गरिएको भए पनि दुर्गम क्षेत्र, खराब मौसम तथा मोबाइल नेटवर्कको अभावका कारण घटना ढिलो गरी सार्वजनिक भएको हो।प्रहरी, प्रशासन तथा उद्धार टोलीले घटनास्थलमा खोज तथा उद्धार अभियान सञ्चालन गरिरहेका छन्। तर सडक अत्यन्तै जोखिमपूर्ण हुनुका साथै गाडी करिब ५०० मिटर गहिरो भीरमा खसेकाले उद्धार कार्यमा कठिनाइ भइरहेको जनाइएको छ।हिमाचल प्रदेश सरकारले घटनालाई गम्भीर रूपमा लिँदै उद्धार कार्यको निरन्तर निगरानी गरिरहेको जनाएको छ। बेपत्ता व्यक्तिहरूको खोजी जारी रहेको र घटनाबारे थप अनुसन्धान भइरहेको अधिकारीहरूले बताएका छन्।