मेस्सी कार्यक्रम विवादमा पूर्व खेलमन्त्री अरूप विश्वासविरुद्ध एफआईआर दर्ता

पश्चिम बंगालका पूर्व खेलमन्त्री तथा तृणमूल कांग्रेस (TMC) नेता अरूप विश्वास विरुद्ध चर्चित ‘मेस्सी कोलकाता कार्यक्रम’ विवादमा एफआईआर दर्ता गरिएको छ। कार्यक्रमका मुख्य आयोजक सतद्रु दत्तले दिएको उजुरीका आधारमा बिधाननगर दक्षिण प्रहरी स्टेशनमा मुद्दा दर्ता गरिएको भारतीय सञ्चारमाध्यमहरूले जनाएका छन्। उजुरीमा अरूप विश्वासमाथि कार्यक्रमका लागि जारी गरिएका कम्प्लिमेन्टरी टिकट, एक्रिडिटेसन कार्ड तथा विशेष पासहरूको दुरुपयोग, दबाब सिर्जना, आपराधिक धम्की तथा प्रभावको दुरुपयोग गरेको आरोप लगाइएको छ। आयोजक दत्तले कार्यक्रम व्यवस्थापनमा राजनीतिक हस्तक्षेपका कारण अव्यवस्था उत्पन्न भएको दाबी गरेका छन्।  सन् २०२५ डिसेम्बरमा साल्ट लेक स्टेडियममा अर्जेन्टिनी फुटबल सुपरस्टार लियोनल मेस्सीको ‘GOAT India Tour’ अन्तर्गत आयोजित कार्यक्रममा व्यापक अव्यवस्था देखिएको थियो। हजारौं दर्शकले टिकट खरिद गरे पनि मेस्सीलाई नजिकबाट हेर्न नपाएको भन्दै आक्रोश व्यक्त गरेका थिए भने स्टेडियमभित्र तोडफोडसमेत भएको थियो।घटनापछि पक्राउ परेका आयोजक सतद्रु दत्तले आफूलाई बलिको बोको बनाइएको दाबी गर्दै पूर्व मन्त्रीसहित केही उच्च अधिकारीहरूको भूमिकामाथि अनुसन्धान गर्न माग गरेका थिए। प्रहरीले घटनासम्बन्धी थप अनुसन्धान अघि बढाइरहेको जनाएको छ।