पश्चिम बंगालका मुख्यमन्त्री शुभेन्दु अधिकारीले सरकारी अस्पतालहरूमा देखिँदै आएको बिरामी रेफर गर्ने समस्या तथा दलाल चक्र नियन्त्रण गर्न कडा कदम चाल्ने घोषणा गरेका छन्। यसका लागि स्वास्थ्य भवनमा २४ घण्टा सञ्चालन हुने विशेष कन्ट्रोल रुम स्थापना गरिने भएको छ, जहाँबाट राज्यभरका जिल्ला अस्पताल तथा मेडिकल कलेजहरूको प्रत्यक्ष निगरानी गरिनेछ। मुख्यमन्त्रीका अनुसार कन्ट्रोल रुममार्फत अस्पतालमा चिकित्सकहरूको उपस्थितिदेखि बिरामीले सेवा पाए–नपाएको अवस्था, सरसफाइ, सुरक्षा व्यवस्था तथा कुनै प्रकारको दलाल गतिविधि भइरहेको छ कि छैन भन्ने विषयमा नियमित निगरानी गरिनेछ। यसका लागि दक्ष तथा पेशागत जनशक्ति समेत नियुक्त गरिने जानकारी दिइएको छ।
सरकारले अस्पतालहरूमा अनावश्यक रेफर रोक्न विशेष समन्वय प्रणाली लागू गर्ने तयारी पनि गरिरहेको छ। सरकारी अस्पतालमा अत्यधिक चाप परेको अवस्थामा राज्य सरकारबाट सहुलियतमा जमिन प्राप्त गरेका निजी अस्पतालहरूमा बिरामी पठाइनेछ, जहाँ राज्यबाट रेफर गरिएका बिरामीका लागि निश्चित शय्या (बेड) उपलब्ध गराउनुपर्ने व्यवस्था गरिने बताइएको छ। मुख्यमन्त्री अधिकारीले अस्पतालभित्र हुने दलाल गतिविधिप्रति ‘जिरो टोलरेन्स’ नीति अपनाइने स्पष्ट गर्दै आम नागरिकलाई यस्ता गतिविधिबारे जानकारी दिन आग्रह गरेका छन्। साथै अस्पताल व्यवस्थापनलाई थप पारदर्शी, उत्तरदायी र बिरामीमैत्री बनाउन विभिन्न सुधार कार्यक्रमहरू पनि अघि बढाइने जनाइएको छ।
