दार्जीलिङका सांसद श्रीमान राजु बिष्ट गोजमुमो अध्यक्ष श्रीमान बिमल गुरुङ महासचिव रोशन गिरि लगायत पहाडका तीन बिधायक क्रमैले नोमन राई, सोनाम लामा, भरत छेत्रीको टोलीले कलकत्ताको नवन्नामा पहाडका विभिन्न ज्वलन्त विषयहरूलाई लिएर पश्चिम बंगालका मुख्यमन्त्री माननीय सुभेन्दु अधिकारीसँग उच्चस्तरीय बैठक तथा महत्वपूर्ण भेटघाट गरे।
उक्त बैठकमा जीटीएमा भएको व्यापक घोटाला, शिक्षक भर्ती प्रक्रियामा देखिएको अनियमितता, “हर घर जल” योजना तथा “अमृत” योजनामा भएको कथित भ्रष्टाचारमाथि उच्चस्तरीय निष्पक्ष जाँचको माग जोडदार रूपमा उठाइयो। साथै, पहाडका जनताले भोगिरहेका विभिन्न प्रशासनिक तथा विकाससम्बन्धी समस्याहरूको शीघ्र समाधान गर्नुपर्ने विषयमा पनि छलफल सम्पन्न भयो।
अर्कोतिर २००७ देखि २०१७ सम्मको गोर्खाल्यान्ड आन्दोलनमा सहिद भएका वीर योद्धाहरूको बलिदानलाई सम्मान गर्दै, प्रत्येक सहिद परिवारका १८ वर्षदेखि ४५ वर्षसम्मका योग्य सदस्यलाई सरकारी नोकरी प्रदान गरिने मांग समेत राखे। विशेषगरी पढ्न, लेख्न सक्ने तथा आवश्यक योग्यता पुगेका सदस्यलाई प्राथमिकताका साथ रोजगारीको अवसर उपलब्ध गराइने विषमा पनि चर्चा गरियो। मुख्यमन्त्रीसंगको भेटघाटपछि गोर्खा जनमुक्ति मोर्चाले पहाडका जनताको हक, अधिकार र पारदर्शी प्रशासनको पक्षमा निरन्तर आवाज उठाइरहने प्रतिबद्धता व्यक्त गरेको छ।
