गोरामुमो पुल-बिजनबारी-गोक समष्टिको साङ्गठनिक सभा सम्पन्न

गोर्खा राष्ट्रिय मुक्ति मोर्चा दार्जीलिङ ब्राञ्च कमिटी अन्तर्गत पुल-बिजनबारी-गोक समष्टिको विभिन्न शाखाका प्रतिनिधिबर्गलाई लिएर एक महत्वपूर्ण सांङ्ठनिक सभा सम्पन्न भयो। जसमा संगठन विस्तारलाई तीव्रता दिने निर्णय गरियो। उक्त जानकारी समष्टि अध्यक्ष अमोद लकान्द्रीले दिएका छन्। समष्टि उपाध्यक्ष गाइस सुब्बा, चैनपुरे ग्राम शाखा उपाध्यक्ष पेम्बा डुक्पा, समष्टि गोरानासं संयोजिका मेघ्ना राई तथा समष्टि महासचिव किरण राईको नेतृत्वमा सम्पन्न सभामा कम्जोर शाखा, अप्पर नेजि शाखा, लोवर नेजि शाखा, लोवर कोलबुङ तथा अप्पर कोलबुङ शाखाका प्रतिनिधिबर्गको उल्लेखनीय उपस्थिति रहेको थियो। सभामा संगठनलाई अझ सशक्त र सक्रिय बनाउने उद्देश्यसहित विभिन्न महत्वपूर्ण विषयहरूमाथि विस्तृत छलफल गरिएको थियो। विशेषगरी गाउँ-गाउँसम्म संगठन विस्तार, जनसम्पर्क अभियानलाई तीव्रता दिने तथा युवावर्गलाई पार्टीसँग जोड्ने विषयलाई प्राथमिकताका साथ अघि बढाउने निर्णय गरिएको छ। त्यसै गरी, गोरामुमो अध्यक्ष मन घिसिङको नेतृत्वलाई अझ मजबुत बनाउँदै पार्टीको सांगठनिक आधारलाई जरो स्तरसम्म सुदृढ पार्न प्रत्येक शाखाले तत्काल सक्रिय रूपमा कार्य गर्ने प्रस्ताव सर्वसम्मतिले पारित गरिएको छ। सभामा उपस्थित नेताहरूले संगठनलाई जनताको विश्वास र अपेक्षाअनुसार अघि बढाउँदै क्षेत्रीय अधिकार, पहिचान र जनहितका मुद्दाहरूलाई सशक्त रूपमा उठाइरहने प्रतिबद्धता व्यक्त गरेका छन्।