गोर्खा राष्ट्रिय मुक्ति मोर्चाको संगठन विस्तार अभियानलाई थप मजबुती प्रदान गर्दै इन्डियन गोर्खा जनशक्ति फ्रन्ट (आईजीजेएफ) बाट २० घर परिवार आज औपचारिक रूपमा गोरामुमोमा सामेल भएका छन्। दार्जीलिङ स्थित गोरामुमो केन्द्रीय कार्यालयमा आयोजित कार्यक्रममा पार्टी अध्यक्ष मन घिसिङको प्रमुख उपस्थितिमा खर्साङ ब्राञ्च कमिटी अध्यक्ष निमा लामा अनि केन्द्रीय समिति सदस्य पारस गुरुङको नेतृत्वमा मिरिक क्षेत्रबाट आएका आईजीजेएफ संस्थापक सदस्य एम. के. पाख्रीनसहित २० घर परिवारले गोरामुमोलाई समर्थन जनाएका हुन्।
कार्यक्रममा अध्यक्ष मन घिसिङले नवप्रवेशी सदस्यहरूलाई खदा लगाएर स्वागत गर्दै गोरामुमोमा सामेल भएकोमा बधाई ज्ञापन गरे। उनले जाति र माटोको हितका लागि सबै एकजुट भएर कार्य गर्नुपर्ने आवश्यकता औंल्याउँदै संगठनलाई अझ सशक्त बनाउन सबैको सक्रिय भूमिकाको अपेक्षा व्यक्त गरे। यस अवसरमा खर्साङ ब्राञ्च अध्यक्ष निमा लामाले पार्टीको झण्डा प्रदान गर्दै नवप्रवेशीहरूलाई भव्य स्वागत जनाएका थिए। गोरामुमोमा औपचारिक रूपमा सामेल भएपछि आईजीजेएफका संस्थापक सदस्य एम. के. पाख्रीनले गोर्खा राष्ट्रिय मुक्ति मोर्चाले आज पनि जातीय अस्मिता र जनभावनाको मुद्दालाई सशक्त रूपमा बोकेको स्पष्ट भएको बताए।
अध्यक्ष मन घिसिङसँगको भेटघाटपछि पार्टीको विचारधारा, लक्ष्य तथा भावी योजनाबारे आफूहरू विश्वस्त बनेको उल्लेख गर्दै उनले गोरामुमो संस्थापक अध्यक्ष सुवास घिसिङले देखाएको गोर्खा जातिको सपना अध्यक्ष मन घिसिङको नेतृत्वमा पूरा हुने विश्वास व्यक्त गरे। उनले आगामी दिनमा घरदैलो अभियान सञ्चालन गर्दै संगठन विस्तारका साथै जनतालाई राजनीतिक रूपमा सचेत गराउने अभियानलाई तीव्र बनाइने पनि जानकारी दिएका छन्।
