भारतीय गोर्खा प्रजातान्त्रिक मोर्चा (BGPM) का विभिन्न तहमा जिम्मेवारी सम्हालिरहेका चार जना नेताहरू आज गोर्खा राष्ट्रिय मुक्ति मोर्चा (गोरामुमो) मा औपचारिक रूपमा सामेल भएका छन्। गोरामुमोको केन्द्रीय कार्यालय, दार्जिलिङमा आयोजित कार्यक्रममा भारतीय गोर्खा प्रजातान्त्रिक मोर्चाका निम्न नेताहरूले पार्टी प्रवेश गरेका हुन्: नितिन छेत्री- अर्गनाइजेसन सचिव, खर्साङ महकुमा समिति दिलिप छेत्री- सचिव, सुकुना ब्लक कमिटी सुर्य छेत्री- सचिव, चम्टा-कुकलुङ बस्ती बुथ कमिटी प्रकाश लामा- अध्यक्ष, खैरेनी-पुन्डिङ बस्ती बुथ कमिटी नवप्रवेशी नेताहरूलाई गोरामुमो अध्यक्ष मन घिसिङ ,खर्साङ ब्राञ्च कमिटी अध्यक्ष निमा लामा तथा गोर्खा राष्ट्रिय नारी संगठनका प्रतिनिधिहरूले खदा लगाई भव्य स्वागत गरेका थिए। यस अवसरमा अध्यक्ष मन घिसिङले गोर्खा समुदायको अधिकार, पहिचान र स्थायी राजनीतिक समाधानका लागि गोरामुमो निरन्तर संघर्षरत रहेको उल्लेख गर्दै नवप्रवेशीहरूलाई संगठनलाई अझ सशक्त बनाउन सक्रिय भूमिका निर्वाह गर्न आग्रह गरे। पार्टी प्रवेशसँगै खर्साङ क्षेत्रका विभिन्न स्थानमा गोरामुमोप्रति जनआस्था र समर्थन बढ्दो क्रममा रहेको नेताहरूले बताएका छन्। नवप्रवेशीहरूले पनि गोर्खाल्याण्डको मुद्दा, गोर्खा जातिको सम्मान र जनहितका सवालमा गोरामुमोको नेतृत्वमा दृढतापूर्वक काम गर्ने प्रतिबद्धता व्यक्त गरेका छन्।
