अखिल भारतीय अन्ना द्रविड मुनेत्र कषगम (एआईएडीएमके) भित्रको विवाद थप चर्किएको छ। पार्टीका वरिष्ठ नेता सी. वी. शन्मुगम नेतृत्वको एक पक्षले अभिनेता तथा मुख्यमन्त्री विजय नेतृत्वको तमिळगा वेत्री कषगम (टीभीके) सरकारलाई समर्थन गर्ने घोषणा गरेको छ। शन्मुगमले एआईएडीएमकेले पछिल्ला वर्षहरूमा लगातार निर्वाचन हार्दै गएको उल्लेख गर्दै पार्टीलाई पुनर्जीवित गर्न नयाँ राजनीतिक दिशा आवश्यक रहेको बताएका छन्। उनले पार्टीका महासचिव तथा पूर्वमुख्यमन्त्री एडप्पाडी के. पलानीस्वामी (ईपीएस) माथि डीएमकेसँग मिलेर सरकार गठन गर्ने प्रस्ताव अघि सारेको आरोपसमेत लगाएका छन्। शन्मुगमले एआईएडीएमकेको स्थापना नै द्रविड मुनेत्र कषगम (डीएमके) को विरोधमा भएको स्मरण गराउँदै डीएमकेको समर्थनमा सरकार गठन गर्नु पार्टीको सिद्धान्तविपरीत हुने बताएका छन्। “५३ वर्षदेखि हाम्रो राजनीति डीएमकेको विरोधमा आधारित रह्यो, यस्तो अवस्थामा डीएमकेको समर्थनमा सरकार बनाएको भए एआईएडीएमकेको अस्तित्व नै समाप्त हुन्थ्यो,” उनले बताएका छन्। शन्मुगम पक्षले टीभीकेलाई समर्थन गर्ने निर्णय एआईएडीएमके विधायकहरूको सहमतिमा भएको दाबी गरेको छ। यद्यपि ईपीएस निकट नेताहरूले उक्त कदमको विरोध गर्दै विद्रोही समूहलाई पार्टीविरोधी गतिविधिमा लागेको आरोप लगाएका छन्। यस घटनाले तमिलनाडुको राजनीतिक समीकरणमा नयाँ मोड ल्याएको विश्लेषण गरिएको छ।
