मुलुकको राजधानीमा सञ्चालित दिल्ली गोर्खा मदर्स वेलफेयर सोसाइटीले उखरमाउलो गर्मीमा बाटो हिड्ने मानिसहरूलाई बाँट्यो चिसो पानी। विगत 2015 मा स्थापित दिल्ली गोर्खा मदर्स वेलफेयर सोसाइटीले आफ्नो स्थापनाको प्रत्येक वर्ष आमा दिवसमा यसरी नै चिसो पानी बाँढ्दै आइरहेको छ। त्यही क्रमलाई निरन्तर दिंदै आमा दिवसमा दक्षिण दिल्लीको वसन्त नगर अवस्थित हनुमान मन्दिर नजीक यो मानवीय कार्य गरेको थियो। स्मरण रहोस् रोजगारको सिलसिलामा देशको विभिन्न ठाउँबाट रोजगारका लागि दिल्ली पुगेका गोर्खे महिलाहरूले उक्त संस्थाको माध्यमबाट आफ्नो कार्यसङ्गसङ्गै विभिन्न सामाजिक कार्यहरू गर्दै आइरहेका छन्।
जसमा भाषा-साहित्य, नाटक-चलचित्रको माध्यबाट गोर्खाहरूबीच सचेतना कार्यक्रमहरू गर्दै आइरहेको छ। विशेष गरी दिल्लीमा नै जन्मिएका गोर्खे नानीहरूलाई मातृभाषाप्रति रुझान बढाउने, उनीहरूबीच मातृभाषामा बोलचाल गराउने, बसेर चित्र बनाउने प्रतियोगिता, जसमा गोर्खा समाजका विशिष्ट व्यक्तिहरूको परिचय गराउने, आफ्नो समुदायको बारेमा जागरूक गराउने, गीत अनि नृत्य प्रतियोगितालगायत अन्य शिक्षामूलक विभिन्न प्रकारको प्रतियोगिताहरू पनि आयोजन गर्दै आइरहेको छ। यसै गरी फूलपातीको दिन सांस्कृतिक शोभा यात्राको आयोजन गरेर अन्य समुदायबीच गोर्खाहरूको पहिचान दिंदै आइरहेको छ। क्रमशः भानु जयन्ती आयोजन गरी रामायण, लोकगीत र लोकनाच प्रतियोगिता गराउने कार्य गर्दै आइरहेको छ।
गोर्खाहरू परापूर्वकालदेखि देशप्रतिको माया, भक्ति कति राख्छन् भन्ने कुरालाई अघि बढाउँदै नानीहरूलाई त्यस्तै देशप्रेम देशवासीप्रति प्रेम सिकाउँदै आइरहेको छ। यसै क्रममा आमा दिवसको उपलक्ष्यमा आइतबार बाटो हिड्ने तिर्खाएका मानिसहरूलाई चिसो पानी वितरण गरेर उनीहरूबाट प्रशस्तै प्रशन्सा बटुलेको दिल्ली गोर्खा मदर्स वेलफेयर सोसाइटीकी उपाध्यक्ष सुष्मा गोम्सले जानकारी दिएकी छिन्।
