सिलगढीको उत्तर एक्टियासल पाइपलाइन क्षेत्रमा गाई चोरीको आशंकामा भएको भीड कुटपिट (मब असल्ट) घटनामा एक जनाको मृत्यु भएको छ भने अर्का एक जना गम्भीर अवस्थामा उपचाररत रहेका छन्। प्राप्त जानकारीअनुसार शुक्रबार रातिदेखि नै सो क्षेत्रमा गाई चोरीको हल्ला फैलिएको थियो, जसका कारण स्थानीय बासिन्दाहरू सतर्क अवस्थामा रहेका थिए। शनिबार बिहान दुई जनालाई शंकास्पद गतिविधिमा संलग्न भएको भन्दै स्थानीयले नियन्त्रणमा लिएका थिए। स्थानीय बासिन्दाहरूले ती व्यक्तिहरूलाई एउटा खम्बामा बाँधेर निर्घात कुटपिट गरेको आरोप छ। घटनाबारे सूचना पाएपछि आशिघर चौकीबाट पुगेको पुलीसले दुवै जनालाई उद्धार गरी सिलगढी अस्पतालमा पुर्याएको थियो।
अस्पतालमा चिकित्सकहरूले एक जनालाई मृत घोषणा गरेका थिए भने अर्का घाइतेको अवस्था गम्भीर रहेको र उपचार जारी रहेको जनाइएको छ। प्रारम्भिक जानकारीअनुसार दुवै व्यक्ति इस्लामपुर क्षेत्रका बासिन्दा हुन सक्ने अनुमान गरिएको भए पनि उनीहरूको पहिचान अझै पुष्टि हुन सकेको छैन। घटनापछि क्षेत्रमा तनावको स्थिति उत्पन्न भएको छ। सम्भावित अप्रिय घटनालाई नियन्त्रणमा लिन ठूलो संख्यामा पुलीस तथा केन्द्रीय सुरक्षा बल परिचालन गरिएको छ। यसैबीच, प्रहरीले घटनामा संलग्न केही व्यक्तिहरूलाई नियन्त्रणमा लिएर सोधपुछ सुरु गरेको र विस्तृत अनुसन्धान अघि बढाइएको जनाएको छ। यस घटनाले गाई चोरीको हल्लाका आधारमा हुने भीड हिंसाको गम्भीरता पुनः उजागर गरेको छ, जसले कानून र मानवअधिकारको विषयमा फेरि बहस सिर्जना गरेको छ।
