लङभ्यू चिया बगानमा श्रमजीवी पहलको चुनाव प्रचार सम्पन्न। सिट्टीमा भोट हालेर शोषण र दमन विरूद्ध जवाब दिनु पर्ने समय आएको छ। श्रमजीवी पहलको स्वतन्त्र उम्मेद्वार सुमेन्द्र तामाङको पक्षमा आज श्रमिकहरूले भोट अपिल गरेका छन्। श्रमिक प्रतिनिधि सङ्गीत छेत्रीले चिया श्रमिकहरूले विगतमा भोग्नु परेका समस्याहरूबारे सचेत गराउँदै यस चोटि श्रमिकहरूको हितका निम्ति खर्साङ विधानसभा समष्टिका श्रमिकहरूले सिट्टी चुनाव चिन्हमा भोट गरिदिने अपिल गरेकी छन्।
यसअघि नामरिङ अनि पुमुङ चिया बगानमा स्वतन्त्र उम्मेद्वार सुमेन्द्र तामाङको चुनाव प्रचार अभियान सम्पन्न भएको छ। श्रमजीवी पहलका युवा कार्यकर्ताहरुले आज क्षेत्रका विभिन्न स्थानहरूमा पदसभाको आयोजना गर्दै श्रमजीवी पहलका स्वतन्त्र उम्मेद्वार सुमेन्द्र तामाङको पक्षमा चुनाव प्रचार गरेका थिए। यसै अवधि कार्यकर्ताहरूले पोस्टरिङ साथै पर्चा वितरण पनि गरेका थिए। अभियान अवधि पदसभालाई सम्बोधन गर्दै छेवाङ योञ्जनले भने “संसद र विधानसभाबाट जनविरोधी कानुनहरू पारित हुँदा हाम्रा सांसद र विधायकहरू किन बोलेनन्?”
श्रमजीवी पहलको पक्षबाट श्रमिकहरुले उठाएको स्वतन्त्र उम्मेदवार सुमेन्द्र तामाङको प्रचार अभियान खरसाङ विधान सभा क्षेत्रको प्रवेश द्वार सुकुनादेखि रोङटाङ, सिपाईधुरा कमान हुँदै नरबुङ कमान, सिविटार कमान, घुम्ती कमान सम्म सम्पन्न भयो। उक्त जन सम्पर्क अभियानमा श्रमजीवी पहलको मुद्दाहरू जन मानिसले राम्ररी आत्मसात गरी रहेका छन्।
मालिकवर्ग, पुँजीवादी व्यवस्था र सरकारहरूको थिचोमिचोविरुद्ध खटीखाने जनताको न्यायिक सङ्घर्षको पक्षमा उभिँदै यसपालिको चुनावमा खरसाङ विधानसभा क्षेत्रबाट श्रमजीवी पहलको हिसाबले सुमेन्द्र तामाङको उम्मेद्वारिताको घोषणा आयो। चुनावको होहल्लामा खटीखाने मानिसहरूका न्यायिक मागहरू नदबियोस् र सामाजिक न्यायको सङ्घर्ष अझै बलियो बनाउने उद्देश्य लिएर यो उम्मेद्वारिताको घोषणा आज खरसाङ प्रेस क्लबबाट गरियो। विभिन्न चिया बगानका श्रमिक, खरसाङ विधानसभा क्षेत्रका युवाहरू अनि कैयौँ सामाजिक अभियन्ताको उपस्थितिमा आज यो आशाप्रद घोषणा आएको छ।
लङभ्यु चिया बगानका श्रमिक तनुजा लामा अनि रिङटङ बगानका सुधा तामाङले आ-आफ्ना वक्तव्य राख्दै भने– विगतमा धेरै चुनाव भयो र धेरैले जिते, तर मजदुरहरूको समस्याका समाधानको कोसिस खासै देखिएन। मालिकहरूको इशारामा सरकारहरूले चलाई रहेको यस व्यवस्थाभित्र केही पाउनुका लागि सङ्घर्ष बाहेक अन्य बाटो छैन। त्यसैले सङ्घर्षकै निरन्तरतामा श्रमिकहरूकै अगुवाईमा श्रमिक कार्यकर्ता खरसाङनिवासी सुमेन्द्र तामाङलाई उम्मेद्वारको हिसाबले श्रमिकहरूले अघि सारेका छन्।
श्रमिकहरूले वक्तव्य राखेपछि समाजकर्मी छेवाङ योञ्जन अनि सुमेन्द्र तामाङले कुन दृष्टिकोण र कुन कुन मुद्दा लिएर यो चुनावी अभियान हुनेवाला छ त्यसबारे बताए। यस पहलको घोषणाअनुसार खटीखाने जनताको न्यायिक सङ्घर्ष, चिया र सिङ्कोना श्रमिकलाई वैधानिक मिनिमम वेज र पर्जापट्टा, किसान अनि बनवासीहरूका लागि सही हक माग्न, युवाहरूलाई सम्मानपूर्ण रोजगार, विद्यार्थीहरूलाई स्तरीय शिक्षा, सबैका लागि आवास-स्वास्थ्य-पानी-सडक माग्न, धर्म-जातपात-जाति-लिङ्गको भेदभावविरुद्ध समानता-आधारित समाज निर्माणको पक्षमा सङ्घर्ष गर्न, धार्मिक कट्टरवादको आडमा देशको श्रम, सम्पत्ति र प्राकृतिक सम्पदा बेच्दै फासिवाद लागु गर्न खोज्ने षडयन्त्रविरुद्ध, बिजेपीको धार्मिक भेदभाव र हिंसाको राजनीति, फासीवादी प्रवृत्ति अनि तृणमूल-भागोप्रमोको भ्रष्टाचार र हैकमवादविरुद्ध, उत्पीडित राष्ट्रियताको आत्मनिर्णयको अधिकार र सङ्घीयताको पक्षमा, मानिसहरूबिच खाडल बनाउने र जनतालाई हैरान पार्ने SIR, NRC, नोटबन्दी जस्ता नीतिहरूविरुद्ध, शासकदलहरूको भ्रष्टाचार, हैकमवाद, भाइभतिजावादविरुद्ध, पर्यावरण-विनाशकारी जनविरोधी प्रजेक्टहरू रद्द गर्ने माग आदि विषयहरू लिएर यस श्रमजीवी पहल निरन्तर चल्ने छ।
