रेलिङ–कैजले समष्टि अन्तर्गत पर्ने रेलिङ ग्राम पञ्चायत अधीनस्थ रेलिङ होमडाँडामा “प्रकृति समाज”को समाजघर निर्माण कार्य सफलतापूर्वक सम्पन्न भएको छ। लामो समयदेखि आवश्यक रहेको उक्त समाजघर आज पूर्ण रूपमा तयार भएसँगै स्थानीयवासीहरूमा खुसीको माहोल छाएको छ।
केही महिना अघि बिजनबारी खण्ड संयोजक भरत तामाङको समष्टि भ्रमणका क्रममा समाजका सम्पूर्ण सदस्यहरूले एकजुट भई नयाँ समाजघर निर्माणको प्रस्ताव अघि सारेका थिए। गाउँमा आवश्यक आधारभूत पूर्वाधारको अभाव रहेको उल्लेख गर्दै समाजले आफ्नो समस्यालाई स्पष्ट रूपमा राखेको थियो। उक्त प्रस्ताव पछि अजय एडवर्ड्ससम्म पुगेपछि समाजका प्रतिनिधिहरूले उहाँसँग प्रत्यक्ष भेटघाट गर्ने निर्णय गरेका थिए।
भेटघाटका क्रममा समाजका सदस्यहरूले आफ्नो आवश्यकता र अपेक्षा विस्तारमा राखेका थिए। सोही क्रममा अजय एडवर्ड्सले कुनै ढिलाइ नगरी समाजघर निर्माण गरिदिने प्रतिबद्धता व्यक्त गर्नुभएको थियो। उहाँको सकारात्मक सोच र दृढ प्रतिबद्धतापछि समाजमा नयाँ आशा र उत्साह थपिएको थियो।
आज उहाँकै पहल र सहयोगमा उक्त समाजघर निर्माण कार्य पूर्ण रूपमा सम्पन्न भएको जानकारी गराउँदै “प्रकृति समाज”का सम्पूर्ण सदस्यहरूले हर्ष व्यक्त गरेका छन्। समाजले अजय एडवर्ड्सप्रति हार्दिक आभार प्रकट गर्दै उहाँले गरेको सहयोगलाई उच्च सम्मान दिएको छ। स्थानीयवासीहरूले यसलाई केवल एउटा भवन मात्र नभई समाजको एकता, विकास र पहिचानको प्रतीकको रूपमा लिएका छन्।
साथै समाजले अजय एडवर्ड्स र उहाँको परिवारप्रति सधैं सुख, शान्ति, समृद्धि र उत्तरोत्तर प्रगतिको कामना व्यक्त गरेको छ। उहाँजस्तो नेतृत्वले गाउँ–गाउँमा यस्ता आधारभूत विकासका कामहरू अघि बढाओस् भन्ने अपेक्षा पनि समाजले राखेको छ।
आगामी दिनहरूमा पनि यस्तै जनमुखी कार्यहरू निरन्तर भइरहून् भन्ने विश्वास व्यक्त गर्दै समाजले अझै विकासका नयाँ योजनाहरूको अपेक्षा गरेको छ। यससँगै आउँदो विधान सभा चुनावका लागि पनि समाजले हार्दिक शुभकामना व्यक्त गर्दै जनहितमा काम गर्ने नेतृत्वको साथमा रहने संकेत गरेको छ।
