आशा भोसलेको मधुर स्वरले सधैं श्रोतालाई मन्त्रमुग्ध बनाउँदै आएको थियो। तर आज उनको त्यो सुरमय यात्रा सधैंका लागि रोकिएको छ। आशा ताईको आवाज अब सदाका लागि मौन भएको छ। मुम्बईस्थित ब्रीच क्यान्डी अस्पतालमा स्वास्थ्यसम्बन्धी समस्याका कारण उनको निधन भएको हो। उनको अन्तिम संस्कार सोमबार साँझ ४ बजे शिवाजी पार्कमा गरिने जानकारी दिइएको छ। निधन हुँदा उनी ९२ वर्षकी थिइन्। आशा भोसलेका थुप्रै यादगार गीतहरू आज पनि श्रोताहरूको मनमा ताजै छन्। “अभी ना जाओ छोड़कर”, “दम मारो दम”, “मोनिका ओ माय डार्लिंग” जस्ता गीतहरूले उनलाई अमर बनाएका छन्। तर धेरैलाई थाहा नहुन सक्छ कि उनले बलिउड फिल्ममा अभिनय पनि गरेकी थिइन्। उनले ७९ वर्षको उमेरमा अभिनय क्षेत्रमा डेब्यु गरेकी थिइन्। आशा भोसलेले सन् २०१३ मा बनेको फिल्म “Mai” मार्फत अभिनेत्रीको रूपमा आफ्नो अभिनय यात्रा सुरु गरेकी थिइन्। उक्त फिल्ममा उनले मुख्य भूमिका निर्वाह गरेकी थिइन् र उनको अभिनयको निकै प्रशंसा गरिएको थियो।
“Mai” एक हिन्दी पारिवारिक भावनात्मक फिल्म हो, जसमा उनले अल्जाइमरबाट पीडित एक विधवाको भूमिका निभाएकी थिइन्। फिल्ममा उनको छोराले उनलाई त्याग्छ भने उनकी छोरी (पद्मिनी कोल्हापुरे) परिवारको विरोधका बावजुद आमालाई आफूसँग राख्छिन्। यस फिल्मले आफ्नै सन्तानबाट परित्यक्त अभिभावकहरूको पीडा र संघर्षलाई भावनात्मक ढंगले प्रस्तुत गरेको छ। फिल्ममा राम कपूरले उनको छोराको भूमिका निर्वाह गरेका थिए। आशा भोसलेले केवल ९ वर्षको उमेरदेखि गायन यात्रा सुरु गरेकी थिइन्। उनको स्वरमा सधैं सुरुवाती दिनहरूको जस्तै मिठास कायम रहेको थियो। अप्रिल ११ शनिबार अचानक स्वास्थ्य अवस्था बिग्रिएपछि उनलाई अस्पतालमा भर्ना गरिएको थियो। आज बिहान उनका छोरा आनन्द भोसलेले उनको निधन पुष्टि गर्दै चिकित्सकहरूको भनाइअनुसार मल्टिपल अर्गन फेलियरका कारण मृत्यु भएको बताएका छन्।
