चुनावी भ्रमण, प्रचारप्रसार तथा जनतासँग प्रत्यक्ष भेटघाट गर्ने क्रममा भागोप्रमो कालेबुङ विधायक उम्मेदवार रुदेन सादा लेप्चा आज र भोलि ३८ नम्बर समष्टिमा सक्रिय छन्। आजको पहिलो चुनावी सभा लिङ्से–पिथामचिन क्षेत्रबाट शुरु गरिएको हो। पिथामचिन सामुदायिक भवनमा सम्पन्न उक्त सभामा तागाथाङ, लिङ्से–दवाइपानी तथा पिथामचिन बुथका जनसाधारणहरूको उल्लेखनीय उपस्थिति देखियो। सभामा व्यापक जनसमर्थन र उत्साहजनक सहभागिताले चुनावी माहोल झन् तातिएको छ। यस क्रममा उम्मेदवार रुदेन सादा लेप्चासँग सभाषद कुमार शर्मा, सभापति पुष्प सुब्बा लगायत अन्य स्थानीय नेतृत्व तथा कार्यकर्ताहरूको पनि उपस्थिति रहेको थियो।
यसअघि भागोप्रमो विधायक उम्मेदवार रुदेन सादा लेप्चा आफ्नो चुनावी प्रचारप्रसारको क्रममा आइतबार ४२ नम्बर रेली-समथार समष्टिमा सक्रिय रूपमा जुटिरहेका छन्। यस क्रममा उनीसँग सभाषद हेमन्त थुलुङ लगायत भागोप्रमो कालेबुङ जिल्ला समिति पदाधिकारी, नारी शक्ति, युवा शक्ति, समर्थक तथा कार्यकर्ताहरूको उल्लेखनीय उपस्थिति रहेको थियो। बिहान रेली बजारबाट सुरु गरिएको समष्टि भ्रमण तथा चुनावी प्रचारप्रसार अभियान पाला खोलाटार, स्योक्वीर खानी बजार, सिञ्जी शुक्रबारे बजार, चारखोल, समथार देवराली, समथार बरगाँज, पन्बु डाँडा लगायत विभिन्न क्षेत्रसम्म पुगेको थियो।
प्रत्येक स्थानमा उनले स्थानीय जनसाधारणसँग प्रत्यक्ष भेटघाट गर्दै आफ्ना विचार राखे र विकासका प्रतिबद्धताहरू व्यक्त गरे। यस क्रममा उम्मेदवार लेप्चाप्रति व्यापक जनसमर्थन र उत्सुकता देखिएको छ। स्थानीय बासिन्दाहरूले उनलाई आगामी विधानसभा चुनावमा विजयी बनाउने दृढता व्यक्त गर्दै उत्साहजनक सहभागिता जनाएका थिए।
