भारतीय गोर्खा प्रजातान्त्रिक मोर्चाको खरसाङ्का प्रार्थी अमर लामाले आगामी लोकसभा चुनाउको निम्ति बुधवार आफ्नो नामाङ्कन बुझाए। तिनले आफ्नो नामाङ्कन पत्र खरसाङ महकुमा शासक कार्यालयमा पुगेर बुझाए। पार्टी अध्यक्ष अनित थापा, विभिन्न समष्टिका सभासदहरू, पार्टी नेतृत्वहरू लगायत पार्टीका धेरै समर्थकहरूको साथमा खरसाङ बजारको मोटर स्ट्याण्डबाट एउटा ऱ्य़ाली निकालियो। ऱ्यालीले खरसाङ शहर परिक्रमा गर्दै यहाँको महकुमा शासक कार्यालयमा पुगेर प्रार्थी लामाले नामाङ्ककन बुझाए। शुरूमा लामाले खरसाङ शहरको जगदीश मन्दिर अनि त्यसपछि गिद्ध पहाड़को देवी मन्दिरमा पुगेर पूजा अर्चना गरे औ त्यसपछि तिनी यहाँको मोटर स्ट्याण्डमा आए। त्यहाँ हिन्दु, मुस्लिम, इसाईका पुरोहितहरूले विधिपूर्वक पूजा अर्चना गर्दै अमर लामाको जीतको कामना गरे। यसै अवधि जीतको शुभकामना दिँदै पूर्व राज्यसभा सासंद शान्ता छेत्रीले मिठाई खुवाइन् तथा खदा लगाइन् औ नारी शक्तिद्वारा माला लगाएर शुभकामना दिइयो। त्यसपछि भेलालाई प्रार्थी लामाले सम्बोधन गर्दै पार्टीको जीतलाई निश्चित पार्न सबैको यस्तै साथ र सहयोग चाहिने जनाए।
पार्टी अध्यक्ष अनित थापाले सबैलाई चुनाउ अवधि शान्ति बनाइराख्ने आग्रह गर्दै पहाडको तीनैवटा आसनबाट निश्चित रूपमा जित्ने दावी गरे। थापाले जितेपछि पनि उस्तो खुशी नहुने कारण हार्नेहरू पनि आफ्नै मान्छे हुन्छन् भन्दै यद्यपि विपक्षीहरूले मोमबत्ती निभ्छ भन्थे अब कहिले पनि ननिभ्ने टर्च लाइट लिएर आएका छौँ भनी बताए। नामाङ्कन बुझाएपछि पत्रकारहरूलाई सम्बोधन गर्दै प्रार्थी लामाले तिनको जीत निश्चित रहेको जनाए। आज तिनले आफ्नो प्रार्थीको नामङ्कन पत्र बुझाइएको तथा शपथ पनि लिएको जनाए। लामाले पार्टीको चुनाउ चिन्हबारे जानकारी गराउँदै आज तिनले तीनवटा चिन्ह बुझाएको तर जहाँसम्म तिनीहरूको चुनाउ चिन्ह टर्च लाइट नै हुने जनाए। यसबारे कोही पनि अन्योल नबनिदिने आग्रह गर्दै पार्टीको चिन्हबारे प्रत्येक घर दैलोमा गएर मानिसहरूलाई जानकारी गराउने पनि तिनले जनाए। चुनाउ प्रचारको निम्ति धेरै समय नरहेकोले अब प्रचारको क्रमलाई युद्ध स्तरमा अघि बढ़ाएर लैजाने तिनले अवगत गराए।
